Министерот за внатрешни работи Панче Тошковски најави дека средното полициско училиште повторно ќе почне со работа од септември следната година.

Одговарајќи на новинарски прашања за тоа како тоа ќе функционира во пракса, Тошковски најави и загарантирано вработување за сите матуранти кои ќе го завршат училиштето.

„Сите оние кои во иднина ќе се запишат на полициската академија во рамките на средното полициско училиште и успешно ќе ја завршат, ќе бидат дел од структурите на Министерството за внатрешни работи, што значи дека вработувањето во Министерството за внатрешни работи е загарантирано“, вели Тошковски.

„За почеток, планирано е во рамките на специјализираното средно полициско училиште да се интегрираат оние ученици кои ќе ја завршат втората година во рамките на други средни училишта, што значи дека ќе ја започнат третата и четвртата година од образованието во средното полициско училиште“, рече Тошковски.