Пари за земјоделките што се на породилно боледување се обезбедени за оваа година. Програмата за поддршка на социјалната сигурност на земјоделките тежи 6 милиони денари, буџетски средства. Тие се наменети за деветмесечниот надоместок за породилно во износ од 10.000 денари на сите земјоделки што имаат статус на осигуреник-индивидуален земјоделец стекнат според Законот за пензиското и инвалидското осигурување. Програмата е објавена во „Службен весник“ минатата недела, а исплатата на средствата од оваа програма ја врши Агенцијата за финансиска поддршка на земјоделството и руралниот развој.

По 30 години борба со институциите, мајките земјоделки од 2023 година може да користат платено деветмесечно породилно отсуство.

Првата пилот мерка им обезбеди вкупно 81.000 денари или по 9.000 денари месечно и ги изедначи со другите жени што станале мајки и примаат надоместок преку Фондот за здравство.

– Програмата беше привремено решение и има механизми за да не биде злоупотребена од оние што не се занимаваат со земјоделство. Продолжуваме да работиме за да изнајдеме и системско решение, но не само за мајчинството, туку да им обезбедиме и платено болничко лекување на регистрираните земјоделци – истакна неодамна Васка Мојсовска, претседателка на Националната федерација на фармери.

Инаку, нешто помалку од 50 отсто од вкупниот број вработени во државата се вработени во руралните средини. Во 2022 година се евидентирани 1.075 индивидуални земјоделки.

– Високиот процент на рурални жени што не се активни на пазарот на труд произлегува од нивниот ангажман во домот, како што е: грижа за деца, грижа за постари лица и други домашни обврски кои претставуваат неплатена работа и покрај тоа што активно работат на поле и се активно вклучени во земјоделството. Дури и кога работниот труд на жената е платен, тие заработуваат само 33 проценти од она што го заработуваат мажите во истиот сектор – посочи Мојсовска.