Петар Богојески е именуван за нов директор на Националната агенција за европски образовни програми и мобилност, соопшти Владата.

Агенцијата управува со значаен фонд на средства, од кои најголем дел доаѓаат од програмата „Еразмус+“ на Европската Унија. Програмата има за цел да го поддржи образованието, обуката, младите и спортот во земјите од Европа, меѓу кои и Македонија.

Богојески, кој е претседател на малата десничарска партија Македонски концепт, своевремено беше разрешен од функцијата заменик-генерален секретар на ВМРО-ДПМНЕ, откако беше дел во тогашната „реформска“ фракција во партијата. Тој во Националната агенција доаѓа на местото на досегашниот директор Марко Ѓоргиевски, кој раководеше со институцијата од ноември 2020 година.

Претходно, Агенцијата ја предводеше Лидија Димова, која беше разрешена поради наводни злоупотреби на пари од европските фондови, но подоцна на суд се докажа дека е невина.