По петдневна интензивна работа на терен на екипи на ЕВН и компанијата задолжена за одржување на електромрежата „Инсталација“ од Кичево, сите осумдесет селски населби во општина Кичево добија електрично напојување, а последен е отстранет дефектот во село Малкоец.

– Конечно на целата територија на нашата општина отстранети се дефектите во електромрежата и струја добија сите селски населби, со што овој проблем е целосно надминат. Останува сè уште целосно да се реши проблемот со проодноста на патиштатата до осум ридско-планински села во општината во делот каде што пропадна тендерот да се избере компанија за зимско одржување на патиштата на јужната страна од општината – вели Дашмире Адеми од подрачното одделение на Дирекцијата за заштита и спасување во Кичево.

Тој додава дека од средата се расчистени патиштата до селата Лавчани, Ехловец и Душогубица, а сè уште останаа потешко проодни патиштата до селата Малкоец, Козичино, Патеец,Рабетино Дупјани и Кладник.

Во меѓувреме, пуштен во употреба отсечениот мост на река Желевица во делчевското село Тработивиште кој пред пет дена настрада во поплавите во Делчевско. Како што информираа мештани насипот на мостот на река Желевица целосно е саниран од десната оштетена страна, со што истиот како што повторно може да се користи.

-Со брзата интервенција на СД Транс од Делчево, на жителите повторно им е овозможено безбедно поминување преку мостот на реката за пристап до своите имоти, до селските гробишта и до туристичкиот локалитет Света Вода, истакнаа жители.

Додаваат дека останува потребата од регулација на речното корито на Желевица, од рибникот до влевањето во Брегалница, со што според нив трајно ќе се отстрани опасноста од идни поплави на селото и полето и оштетувања на мостот.

Оштетувањето на мостот во село Тработивиште беше еден од посериозните проблеми предизвикани од неодамнешниот зголемен водостој на реките, поради обилните врнежи од дожд што го зафатија делчевско. Како последица на обилните врнежи се излеа и реката Брегалница од мини во мајор коритото во урбаниот дел од градот, но не предизвика посериозни проблеми.

Критичните точки во градот, како што додадоа од Општината беа обезбедени со доволен број вреќи со песок, а на располагање за интервенција беше ставена и соодветна механизација.

Снегот што падна деновиве, предизвика проблеми во одвивањето на сообраќајот по патиштата во поголемиот дел на нашата држава, а има и отсечени села во планинските предели. Особено црни точки се превоите каде возачите се соочуваат со неисчистени снежни наноси, па стануваат непроодни дури и за оние чии возила се опремени со потребната зимска опрема.

Од службата на „Македонија пат“ која е надлежна за зимско одржување на регионалните и магистралните патишта велат дека со снегот се справуваат со нивните скромни капацитети на механизација.

– Сообраќајот на државните патишта се одвива по претежно влажни коловози, а на планинските превои наместа со остатоци од кашест снег на коловозот по интервенција на нашите дежурни екипи. На одредени патни правци кои поминуваат низ клисури и усеци можна е појава на поситни одрони. Дежурните екипи на ЈП „Македонија пат“ се постојано на терен и ги одржуваат сите патни правци проодни – информираа од ова јавно претпријатие на нивната официјална интернет страница и апелира на внимателно возење и прилагодување на брзината спрема условите на патот.