Пензионирани полицајци оддавале службени тајни на кланот „Дуќанџик“ од Грчец
Јавното обвинителство ги потврди пишувањата на Слободен печат дека изминатата ноќ се приведени двајца полицајци и уште едно лице бидејќи оддавале службени тајни на на криминалната група „Дуќанџик“ од Грчец.
Препорачано
Како што информираат од Обвинителството, осомничените, од користољубие, се поврзале со организираната криминална група „Дуќанџик“ и како припадници со посебна улога, поттикнати со умисла од првосомничениот во предметот „Грчец“-Шеваљ Муаереми, пренесувале службени информации.
„Во наведениот период осомничените од кои двајца поранешни главни инспектори за имотни деликти, односно недозволена трговија со дрога, преку третоосомничениот за криминалната група прибавувале, пренесувале и споделувале информации за постапки што се од значење за јавната безбедност, како и за безбедносни и разузнавачки активности на државните органи. За ваквото неовластено откривање со кое предизвикале штета во работењето и ефикасноста на истражните органи и органите на прогонот и го отежнувале или оневозможувале обезбедувањето на доказите, осомничените добивале награда“, информираа од Обвинителството.
Осомничените со информациите што ги споделувале, го отежнале докажувањето во кривичните постапки и тоа:
– за кривично-правен настан случен во декември 2019 година, секој посебно заканувајќи се дека повторно ќе биде нападнат тој или членовите на неговото семејство, влијаеле врз оштетен – жртва на обид за Убиство по нарачка, а сега починат, да ја смени изјавата дадена пред овластени полициски службеници;
– за Убиство во месец август 2020 година осомничените споделиле значајни информации за криминалната група;
– во текот на втората половина од 2020 година осомничените споделувале службени информации за примена на посебни истражни мерки за тогаш актуелно криминалистичко истражување под кодно име „Планина“ во кое беа опфатени лица од оваа организирана група;
– за кривично – правен настан случен во септември 2020 година во кој петмина беа осомничени за кривично дело Грабнување биле пренесени информаци за обезбедените докази и изјави на сведоции задржани лица;
– за двојното убиство од март 2021 година во Скопје за кое биле пренесени информации кој е задржан во полициска станица, кои активности се преземаат и кои службени лица се вклучени во криминалистичкото истражување.
Првоосомничениот бил „трн во око“ за полицијата и Обвинителство, бидејќи тој, и членовите на неговото семејство, поседуваат недвижен и движен имот и штедни влогови, што во големи размери ги надминувале неговите законски приходи како полициски службеник.
Осомничените денес ќе бидат изведени пред судија каде што јавен обвинител ќе предложи да им се определи притвор.
Припадници на МВР „паднаа“ на Скај комуникацијата на Шеваљ Муареми – уапсени неколку лица
