Во охридскиот основен суд денеска од почеток започна постапката против Илија Спасески и Борче Ангелоски, кои се обвинети за тепањето на Христијан Пендиков, кој се чувствува како Бугарин, а по случајот доби и државјанство на Бугарија, пренесе „СДК.мк“.

Пендиков не присуствуваше во судницата, но обвинетите одбија вина за овој случај, и преку нивните адвокати се изјаснија дека не го тепале поради национална омраза.

Сведокот Гоце Спасески, татко на првообвинетиот, рече дека не постои национална омраза. Спасески рече дека за време на потонувањето на бродот „Илинден“, тој лично учествувал во спасителната акција и добил Орден од Бугарија.

Судот треба дополнително да одлучи дали ЦД со изјава на Пендиков за бугарска телевизија ќе биде прифатено како доказ. Според одбраната, тој доказ е потребен за утврдување на правната вистина и да докаже дека оштетениот немал повреди, затоа што го дал интервјуто.

Адвокатот на Пендиков, пак, се противи изјавата на Пендиков да биде доказ, оти снимката според него не била релевантна.