Актуелниот претседател и кандидат од СДСМ за втор мандат, Стево Пендаровски изрази поддршка за младите лекари и приватните специјализанти кои за денеска најавија протест за повисоки плати.

– Фер и правилно е секој да биде соодветно вреднуван за својот труд и знаење а младите лекари не само што не смеат да бидат исклучок, туку треба да бидат предводници на тоа правило. Соодветно платени и обезбедени млади лекари и специјализанти денес, се врвни доктори и медицински лица во иднината, порача Пендаровски.

Според него, обезбедувањето фер надомест, платени придонеси и достојни услови за учење и работа, се главните предуслови, младите лекари и специјализанти своите кариери да ги продолжат тука, во својата земја. Младите лекари и приватни специјализанти, рекол Пендаровски, мора да го добијат она што го заслужуваат.