Шарските извори од стариот водоснабдителен систем ја губат издашноста. Проценките на ЈКП „Тетово“ се дека деновиве има над 100 литри вода во секунда помалку во градот под Шара токму поради високите температури. Оттаму велат дека добиваат пријави од повисоките делови од градот дека имаат проблеми со водоснабдувањето. Поради недостиг на количини на вода од стариот водоснабдителен систем, на почетокот на месецов беше вклучен новиот водовод кој добива вода од реката Лешница, но од денеска и тој не е во употреба откако водата се заматила поради невремето.

„Како последица на невремето што викендов го зафати Шарплананискиот појас, водата што доаѓа од изворите на Лешница е заматена и достигна ниво на загаденост над нормалата. Поради оваа ситуација, принудени сме привремено да ја прекинеме употребата на овој ресурс додека не се изврши целосното чистење, процес кој бара време. Моментално градот ќе се снабдува со вода од старите извори и од изворите на Попова Шапка, кои обезбедуваат проток од 350 литри вода во секунда. Оваа количина не е голема, но е доволна за да се излезе на крај со оваа тешка ситуација, доколку сите соработуваме и штедиме вода. Секоја капка вода што ја заштедуваме денеска е инвестиција во нашата заедничка иднина. Ова е моментот кога ние како одговорни граѓани мора да покажеме солидарност и грижа“, информираат од Општина Тетово.

Од ЈКП „Тетово“ велат дека во време на тропски температури кога се намалува издашноста од шарските извори, граѓаните треба да бидат посовесни и порационално да ја користат водата за пиење.

„Годинава имаме уште повеќе зголемено несовесно користење и трошење на водата за пиење. Би сакал да испратам барање до граѓаните да бидат совесни, затоа што некој нема вода за основни потреби, а се злоупотребува за нешто што е луксуз како што е полнење детски базени, перење возила, наводнување домати, цел ден се троши водата. Имаме фаза и кога доаѓаат нашите од другите држави, сега се одморите. Имаме интервенирано кај граѓаните, им посочуваме да не го прават тоа. Општината веќе прави една физибилити студија за водомерите и веројатно ќе се постават водомери низ цел град. Градот да биде опслужен со водомери и потрошувачката да се мери“, истакна Љулзим Шаќири, раководител на сектор Водовод и канализација при ЈКП „Тетово“.

Проблеми со водоснабдувањето во Тетово има и поради сè почестите дефекти на старата и дотраена градска водоводна мрежа од каде што има големи губитоци на вода. Но, засега нема никави најави од општинската власт за нејзина обнова.

Инаку и планинарите сè почесто забележуваат дека изворите на Шарпланинскиот масив, кои порано дури и во летниот период изобилувале со вода, сега во некои од нив речиси и да нема капка вода. Климатските промени си го прават своето, но и човечкиот фактор е пресуден за ваквата состојба.

Пресушуваат изворите на Шара, во Тетово пеколно жешко и жедно