Неговата Светост српскиот патријарх Порфирије, во својство на претседател на Светиот синод на епископи на Српската православна црква, изрази длабока загриженост поради потврдувањето на затворската казна и политичката забрана за претседателот на Република Српска, Милорад Додик, од страна на, како што изјави, „моноетничкиот состав на таканаречениот Суд на Босна и Херцеговина“.

„Иако оваа одлука беше очекувана, сепак ја примив со длабока загриженост. Ова е нелегална и антидемократска акција насочена кон поништување на демократски изразената волја на српскиот народ, делегитимирање на Република Српска и доведување во прашање на нејзиниот опстанок, како и опстанокот на српскиот народ во Босна и Херцеговина“, изјави патријархот.

Српскиот патријарх ја повтори својата целосна и недвосмислена поддршка за претседателот Додик, предупредувајќи дека ова е политички мотивиран процес што може да има далекусежни последици за стабилноста на регионот.

„Загриженоста е уште поголема бидејќи сето ова се случува во просторот што српскиот народ го делел со векови со други народи од исто потекло и јазик. Ги повикувам и апелирам сите верски водачи во Србија, Босна и Херцеговина и пошироко, да сторат сè што е во наша моќ за да го зачуваат мирот и достоинството на нашите народи“, рече патријархот Порфирије.

Укажувајќи на пошироките геополитички трендови, тој предупреди дека „политичките актери не смеат да дозволат нашите народи да бидат жртви на интересите на оние што ги насочуваат овие процеси од далеку“.

„Се молам и ги повикувам сите православни Срби да се молат на Господа за да се постигне барем минимум меѓусебно разбирање, заради општото добро, мирот и иднината на нашиот народ“, заклучи поглаварот на Српската православна црква.