Предлагаме да се достави барање за гласање недоверба на Владата и ги повикуваме сите демократски опозициски партии да ја поддржат нашата иницијатива, порача лидерот на ПАСОК Никос Андруалкис говорејќи попладнево во Парламентот и најави дека в среда ќе може да се достави конкретниот предлог, јави дописничката на МИА од Атина.

Андрулакис во изминатиот период неколку пати порача дека ПАСОК ќе достави предлог за гласање недоверба на Владата, но откако претходно ќе биде објавен експертскиот извештај за железничката несреќа, нешто што беше презентирано претпладнево од Националната управа за истрага на авионски и железнички несреќи и безбедност на транспортот и затоа посочи дека сега е „вистинскиот момент кога има непоколебливи докази против актуелната власт со печат на научната јавност“.

Предлогот ќе биде доставен в среда, со оглед на тоа што за вторник во Парламентот е закажана расправа за формирањето предистражната комисија за поранешниот министер Христос Триантопулос.

За доставување предлог за гласање недоверба на Владата потребни се потписи од една шестина од вкупниот број пратеници во Парламентот, односно најмалку 50 потписи, а ПАСОК има 32 пратенички места што значи дека ќе треба да добие поддршка од опозициските партии.

Од СИРИЗА, која има 26 пратенички места веќе подолг период го повторуваат ставот дека е неопходно доставување предлог за недоверба на актуелната грчка Влада