Општина Центар повторно станува сопственик на спорното земјиште зад зградата на улицата Киро Крстевски – Платник . Оттаму информираат дека благодарение на соработката со една од банките, која ја имала под хипотека оваа парцела, земјиштето ѝ е донирано на Општината.

Пред зградата Киро Крстевски – Платник број 11, жителите со години се спротивставуваа на обидите за узурпација на просторот зад нивната зграда, кој првично бил предвиден за паркинг, но подоцна незаконски добил маркица за градба. Во минатото, тие се соочија со насилни приведувања, притисоци и судири со инспекторите и полицијата, бранејќи го својот имот од градежна механизација, изјави Герасимовски на средбата која ја имаше со граѓаните кои живеат на таа локација.

Дополнително, со поддршка од истата банка, ќе биде покриен трошокот за уривање на нелегално изградената градба, додека Општината ќе го преземе расчистувањето на теренот. Како што нагласи Герасимовски, со оглед на ограничениот пристап и специфичноста на просторот, целиот процес ќе се одвива во неколку фази, со ангажман на соодветна механизација.

Следниот чекор ќе биде општинските служби заедно со со жителите да дефинираат најдобро решение за уредување на просторот. Наместо нова градба, целта е создавање похумана и уредена околина, со баланс меѓу зеленило и функционален јавен простор, во согласност со барањата на граѓаните.

Денес, по 20 години борба, оваа неправда е конечно исправена. Со моја лична заложба како градоначалник и со поддршка од службите, Општина Центар успеа да го врати земјиштето во сопственост на општината. Нема да дозволиме никаква градба на оваа локација! Наместо тоа, во координација со вас граѓаните, ќе обезбедиме похумано и уредено опкружување што ќе одговара на вашите потреби. Ова е победа на вас жителите и доказ дека упорноста носи резултати – рече Герасимовски на средбата со граѓаните.