Папазов и ексдиректорите на ДПИ во куќен притвор, само Бектеши останува во затвор
Поранешниот градоначалник на општина Кочани, Љупчо Папазов, кој си поднесе оставка по трагедијата во Кочани во која досега загинаа 62-ца луѓе, оди во домашен притвор. По барање на обвинителството, во домашен притвор одат уште тројца осомничени, меѓу кои се и поранешниот директор на ДПИ, Горан Трајковски, еден инспектор и еден член на обезбедувањето во дискотеката „Пулс“.
Препорачано
„По поднесените предлози за определување на мерка притвор а врз основа на донесена Наредба за истражна постапка Ко бр.180/25 од 20.03.2025 година на ОЈО Кочани, од страна на Судија на претходна постапка беа определени вкупно 24-дваесет и четири мерки за обезбедување на присуство –притвор, од кои по изјавена жалба од осомничените преку нивните бранители изречената мерка притвор беше замената со мерка куќен притвор за тројца осомничени, а во понатамошниот тек од постапката по даден предлог на ОЈО Кочани за замена на мерката притвор со мерка куќен притвор за 4-четири осомничени беше определена мерка куќен притвор“ соопшти судот во Кочани.
Со проширувањето на истрагата за нови лица, беа опфатени 19 осомничени, од кои четворица се во затворски притвор, осум се во куќен притвор и на седум им се определени мерки на претпазливост.
Во домашен притвор се и другите двајца поранешни градоначалници Ратко Димитриевски и Николчо Илијев, како и ексдиректорката на Државен пазарен инспекторат Анета Симеска Димоска. Другите поранешни министри за економија, Ваљон Сарачини и Беким Незири, се исто така во куќен притвор, додека за Дритон Кучи се изречени мерки на претпазливост. Во меѓувреме, судот во Кочани ги разгледува жалбите на 12 осомничени.
И пензионираните полицајци, кои претходно беа приведени, се пуштени во куќен притвор.
Во затвор останува ексминистерот за економија Крешник Бектеши, на кого денеска му беше продолжен притворот за нови 30 дена, за што неговиот адвокат Еленко Миланов најави жалба.
Од Јавното обвинителство ги демантираа тврдењата дека еден јавен обвинител се повлекол од истрагата за пожарот во Кочани поради наводни притисоци и несогласувања со правната квалификација.
