Папата Франциск  денеска прогласи за светци 14 лица, меѓу кои и „мачениците од Дамаск“, убиени во Сирија за време на Отоманската империја, кои се симбол на христијанскиот прогон, а Светиот Отец ја предводеше церемонијата на канонизација на плоштадот Свети Петар во присуство на илјадници верници од целиот свет.

„Ги запишуваме меѓу светците“, рече Папата изговарајќи го секое име посебно.

Канонизацијата, по беатификацијата, е последниот чекор кон светост во Католичката црква. Потребни се три услови, од кои најважен е поединецот да направил најмалку две чуда. Тој или таа мора да бил мртов најмалку пет години и морал да водел примерен христијански живот додека бил жив.

Меѓу групата има и 11 лица познати како „маченици од Дамаск“, кои беа прогласени за светци околу 160 години по нивната смрт. Осум фрањевци и тројца лаици Маронити (христијани кои зборуваат арапски), сите од истиот манастир, беа убиени во јули 1860 година од страна на милитантите Друзи во главниот град на Сирија, тогаш под отоманска власт. Папата Пие XI ги прогласил за блажени во 1926 година.

Дамаск е дом на една од најстарите христијански заедници во светот, но неговото христијанско население денес се намали на само околу 2 отсто, според Ватикан. Голем број граѓани, и христијани и припадници на други вери, го напуштија градот по почетокот на граѓанската војна во Сирија во 2011 година.

Мачеништвото на канонизираната група од Дамаск „не се разликува многу од ситуацијата во која денес се наоѓаат многу христијани на Блискиот Исток“, пишува Vatican News, официјалниот портал за вести на Ватикан.

Останатите тројца луѓе кои папата Франциск ги прогласи за светци во неделата, починаа на почетокот на 20 век и тие основаа верски заедници. Тоа се италијанскиот мисионер Џузепе Аламан, италијанската калуѓерка Елена Гуера и Канаѓанката Мари-Леони Паради.