Љупчо Палевски Палчо, првоосомничениот за свирепите убиства на 14-годишната скопјанка Вања Ѓорчевска и на 74-годишниот велешанец Панче Жежовски, извршени лани, во ноември, од завчеравечер се наоѓа во притворското одделение во затворот во Шуто Оризари, откако беше екстрадиран од Турција со редовна авионска линија. Од Јавното обвинителство и од Основниот кривичен суд не откриваат кога Палевски ќе биде изведен на распит пред обвинител и судија на претходна постапка, но се очекува тоа да се случи многу брзо.
За убиството на Ѓорчевска и на Жежовски како соизвршители се осомничени Велибор Манев, Влатко Кешишов и Боре Видевски, кои се во притвор од декември минатата година, а Палевски од органите на прогонот беше посочен како директен извршител на убиството, кој Вања и Панче ги убил со пиштол.
Од Јавното обвинителство соопштија дека истрагата за Манев, Кешишов и Видевски за делата грабнување и убиство е при крај, а за Палевски е во тек. Покрај нив, се води истрага за таткото на Вања, Александар Ѓорчевски, за помагање при грабнувањето, кој од неодамна е во домашен притвор, како и за лицето Стефан Димовски, кој го возел Палевски во Турција.

– По екстрадицијата на првиот осомничен од Република Турција, јавниот обвинител од ОЈО Скопје продолжува да презема истражни дејства во предметот за грабнувањето и убиството на Вања Ѓорчевска и Панче Жежовски. За петмина осомничени, од кои тројца соизвршители во тешките кривични дела – две грабнувања и две убиства на свиреп начин, еден осомничен за помагање при грабнувањето на малолетно лице и еден осомничен за помагање по извршеното кривично дело, истрагата е во завршна фаза. Врз основа на меѓународна потерница издадена по наредба на ОЈО Скопје, Република Турција вчера го екстрадираше првиот осомничен за кривичните дела. По барање на јавниот обвинител, за него веќе е определена мерка притвор што веднаш почна да се применува. Во однос на ова лице, јавниот обвинител презема истражни дејства на прибавување и анализа на докази што во оваа фаза на постапката не можат да бидат споделени со јавноста – соопшти денеска Обвинителството.

Сместен во посебно одделение

Палевски од аеродромот до затворот беше спроведен со конвој од четири полициски необележани возила, а камерите го снимија на задното седиште во едно од нив, седнат во средина меѓу двајца полицајци во цивил.

Надлежните во КПУ „Скопје“ во Шуто Оризари информираа дека Палевски е сместен во посебно одделение во притворот, во просторија во која престојува сам и до која се стигнува преку посебен ходник, во кој само дел од затворските чувари имаат пристап. Ќе го чува зголемено затворско обезбедување, а одреден му е и посебен протокол за исхрана. Ќелијата се наоѓа во истиот затворски дел каде што во различни простории се наоѓаат другите тројца осомничени за свирепите убиства.

Најавено е и дека во затворот на Палевски ќе му биде извршен детален медицински преглед. Тој ќе има можност еднаш во текот на денот да шета, но не во друштво на другите притвореници, туку сам, и тоа во засебен отворен простор, поврзан со неговата ќелија, наменета за високоризични притвореници.

Барањето за екстрадиција на Палевски го издаде министерот за правда Кренар Лога на 7 декември 2023 година, а 30 април турското министерството за правда ја одобри постапката. Од Министерството очекува дека постапката за екстрадиција ќе заврши за неколку месеци. Побрзо и не можеше поради сложената и обемна постапка во која се вклучени повеќе институции. Екстрадицијата ја спроведе Секторот за меѓународна полициска соработка на МВР, во соработка со турската полиција.

– Министерството за правда и министерот Кренар Лога изразуваат голема благодарност до турските власти, особено до министерот за правда на Република Турција, Јилмаз Тунч, за нивната брза реакција и преземањето на сите мерки за екстрадиција на Љупчо Палевски. Целата постапка се спроведе во релативно краток период, за неполни пет месеци. Ова е добар знак за општеството и порака дека правдата ќе ве стигне, каде и да сте! – соопшти министерот Лога.

Палевски е претседател на партијата Десна, од каде вчера апелираа надлежните да внимаваат на неговата безбедност.

„Палчо од 17 јануари притискаше да биде екстрадиран. Тој треба да биде на безбедно, изолиран од ризици по живот, убиство, труење со храна, пијалоци, нарушување на здравјето, физичко малтретирање и изнудување признанија, да има лекар што ќе го следи неговото здравје, биохемиска анализа на секој оброк и пијалок што ќе го конзумира и радиолошка проверка на облеката и обувките што ќе ги носи. Анализа на крвта и урината еднаш неделно“, објави партијата на Фејсбук.

Убиства од користољубие?

По убиствата на Ѓорчевска и Жежовски извршени лани во ноември, македонските власти распишаа меѓународната потерница за првоосомничениот Палевски, кој на 5 декември беше лоциран и приведен во градот Беликесир во Турција, каде што беше задржан во екстрадициски притвор. Палевски во Турција заминал од Србија, каде што и се наоѓаше во моментот кога тогашниот министер Оливер Спасовски и скопскиот обвинител Гаврил Бубевски ги притворија тројцата негови соучесници и го посочија Палевски како главен извршител.

Фризерот Панче од Велес беше пријавен за исчезнат на 24 ноември, а малолетната Вања на 27 ноември. Беа пронајдени мртви во близина на Велес и на Скопје на 3 декември. Во тој период, во Скопје се одржуваше самит на ОБСЕ и метрополата беше под многу силно полициско обезбедување.

Според полицијата и Обвинителството, четворицата делата ги извршиле од користољубие, а Манев, Кешишов и Видевски ги признале убиствата. Осомничените го грабнале Жежовски од неговиот дом во Велес, го убиле со пиштол, а телото го фрлиле во јама, во околината на Велес. Намерата им била да му го одземат автомобилот, за со него да ја грабнат Ѓорчевска.

Како што соопшти тогаш Обвинителството, во неговиот дом физички го нападнале, па го врзале и со автомобил го однеле во близина на селото Рудник, каде го убиле на свиреп начин со пиштол во сопственост на еден од осомничените. Ѓорчевска ја грабнале во влезот во нејзината зграда, од користољубие, ја врзале во вреќа за спиење и ја внеле во багажникот од автомобилот на Жежовски. Заминале во атарот на селото Бразда, Скопско, и неколку часа по грабнувањето, ја убиле Вања и го закопале телото, а автомобилот го запалиле. Истражните органи досега не открија што покажала обдукцијата на телата, односно на кој начин се убиени Ѓорчевска и Жежовски.

Овие убиства силно ја потресоа македонската јавност, но и целата балканска јавност, а медиумите со денови известуваа, првин за потрагата по девојчето, за чие исчезнување алармираше нејзината мајка, а потоа и за трагичниот епилог.

За извршеното дело, според Кривичиот законик осомничените може да добијат максимална казна доживотен затвор.