Пакистанската војска веќе ја зголеми својата борбена готовност  бидејќи очекува одговор на индиската војска на инцидентот што предизвика гнев во Њу Делхи.

Пакистанскиот министер за одбрана, Хаваџа Мухамед Асиф, предупреди дека воената конфронтација со Индија е неизбежна откако ескалираа тензиите во Кашмир по смртоносниот терористички напад минатата недела во кој загинаа 26 лица.

Во интервју за Ројтерс, Асиф рече дека пакистанската војска веќе ја зголемила својата  борбена готовност  бидејќи очекува индиски воен одговор на инцидентот, што предизвика негодување во Њу Делхи и беше дочекано со одмазда од владејачката националистичка партија Бхаратија Џаната (БЏП).

Министерот рече дека Пакистан не сака војна, но е подготвен да одговори на каква било агресија, истакнувајќи дека нуклеарното оружје ќе се користи само во случај на директна закана за опстанокот на земјата. Тој ги отфрли индиските обвинувања дека Исламабад стои зад нападот во Пахалгам, нарекувајќи ги неосновани и посочувајќи на можноста за операција со лажно знаме.

Ситуацијата беше дополнително комплицирана откако Индија презеде низа казнени мерки, вклучително и суспендирање на Договорот за водите на Инд, затворање на своите граници и повлекување на дипломатите. Пакистан одговори со слични мерки, суспендирајќи го Договорот Симла и затворајќи го својот воздушен простор за индиските авиони.

Зголемување на бројот на војници и воени вежби

Двете страни распоредија дополнителни војници по линијата на контрола во Кашмир, каде што веќе се регистрирани бројни инциденти, а меѓународната заедница изразува загриженост за ризикот од поширок конфликт меѓу двете нуклеарни сили. Кина повика на смиреност, додека САД сè уште не дадоа јасен став, иако се наведува дека Вашингтон би можел да интервенира во случај на отворена ескалација.

Асиф нагласи дека Пакистан сè уште верува во дипломатско решение, но предупреди дека секој голем индиски напад би довел до тотална војна со катастрофални последици за целиот регион.

Индија им забрани на медиумите да снимаат и објавуваат движење на војници и воена опрема. Според извештаите, Пакистан ги движи своите авиони подлабоко на својата територија за да избегне да биде изложен на потенцијален прв индиски удар. Двете земји спроведуваат големи воени вежби на копно, море и во воздух, а пријавено е и меќусебно  гранатирање на териториите.