Пакетите во поштата во Крагуевац веќе ги сортираат роботи
Роботи во Главниот поштенски центар во Крагуевац од денеска автоматски сортираат 2.500 пакети на час, соопшти Пошта на Србија.
Ова ќе овозможи најмалку трипати побрза достава на поштата до примателите и сортирање на пакетите за поштите во блиските градови, изјави во Крагуевац в.д. директорот на Српската пошта, Зоран Анѓелковиќ. Проектот почна пред една година, објави Пошта.рс.
Препорачано
„Инвестиравме околу 900 милиони динари во роботи, но сум апсолутно сигурен дека тие средства ќе се исплатат, ќе ги забрзаат процесите и ќе го зајакнат нашиот технички, технолошки и човечки потенцијал“, рече Анѓелковиќ.
Министерката за државна управа и локална самоуправа Снежана Пауновиќ во Крагуевац изјави дека јавните претпријатија на Србија „се еден чекор пред трендовите и го подобруваат системот побрзо отколку што ние како мала земја можевме да очекуваме“.
Министерот за информации и телекомуникации Борис Братина изјави дека е почестен што присуствува на церемонијата во Крагуевац „каде што може да се види дека индустријата навистина претставува човечка моќ и можности за практично неограничен развој“.
Градоначалникот Никола Дашиќ изрази задоволство што Крагуевац е втор град во Србија каде што Поштата започна со роботизација и истакна дека Крагуевац „ќе стане примерен српски град со разни паметни решенија“
