Едно од најретко консумираните овошја, малината, неправедно е избегнувано поради мноштвото семчиња што се во нејзиниот состав. Ова „пролетно“ овошје се карактеризира со црвена боја и со прекрасен вкус и се препорачува за сите возрасни групи.

Сепак, кога станува збор за децата, родителите мора да бидат многу внимателни, и тоа поради две причини. Првата е фактот што во еден плод од малина се концентрирани десетици мали семчиња, кои можат да направат одредени проблеми при голтањето. Втората причина за внимателност е доколку им се дава на деца помали од три години. Токму тие спаѓаат во ризичната група каде што многу често се појавуваат алергиски реакции и повторно поради малите семчиња (идентично како кај јагодите).

Нискокалорични и со мал процент на заситени масти

Малините се нискокалорични плодови што имаат мал процент заситени масти. Тие се богат извор на растителни влакна и на антиоксиданти. Како доказ за тоа е податокот дека во 100 грама свежи малини има само 52 калории и 6,5 грама растителни влакна.

Токму ваквата мала калориска вредност и изобилството од растителни влакна ги прават погодно овошје за сите што се на диета.

Висока концентрација на витамини и минерали

Малината со право во минатото била класифицирана како „овошје на боговите“ бидејќи во нејзиниот состав има голема количина витамини и минерали, какви што се калиум, манган, бакар, железо и магнезиум, Б-комплексот, како и со витаминот К.

Калиумот е многу важен дел од клеточните и од телесните течности и помага во регулацијата на работата на срцето и крвниот притисок.

Манганот се користи во телото како кофактор за антиоксидантскиот ензим супероксид дисмутас.

Бакарот е неопходен за создавање на црвените крвни зрнца.

Покрај ова, во составот на малината има и витамин Б6, ниацин, рибофлавин и фолна киселина. Овие витамини имаат функција на кофактори во телото, кои помагаат во метаболизацијата на јаглехидратите, протеините и мастите.

Исто така, малините содржат и антиоксидантски витамини, какви што се витамините А и Е. Покрај гореспоменатите антиоксиданти, тие исто така се богати и со други флавоноидни полифенолни антиоксиданти корисни за здравјето: лутеин, зеаксантин и бета-каротин во помали количини.

Користете го и листот на малината

Малината важи за десертно овошје, а плодовите можат да се користат како свежи и замрзнати, но и за подготовка на сок, сируп, вино, природен ликер, компот, слатко, џем, мармалад, сладолед, кандирано овошје, малина во прав и друго.

Покрај плодот, во народната медицина за подготовка на различни народни лекови се користи и листот од оваа овошка.

Со листот од малина се лекуваат воспалителните процеси на грлото, а се користи и против дијареја.

Во последно време и науката сѐ почесто се занимава со истражување на лековитите својства кај ова пролетно овошје. Многубројни истражувања покажале дека елагинската киселина, која ја има во малината, спречува размножување на клетките на ракот. Во терапијата на малигните заболувања малините не се лек и не можат да го заменат, но се добра заштита од тие болести.