Шпанскиот ветеран Санти Казорла ќе ја продолжи соработката со тимот на Овиедо откако оваа сезона беше еден од најзаслужните што тимот избори пласман во Ла Лига.

Иако има 40 години Казорла покажа дека и понатаму може да игра на високо ниво. Под водство на Вељко Пауновиќ, тој одигра 35 натпревари, постигна пет гола и асистираше уште пет пати, а неговата улога беше клучна во плеј-офот за влез во елитата, каде Овиедо го совлада Мирандес и се врати во шпанскиот фудбалски крем по цели 24 години.

Продолжувањето на соработката со Казорла беше поздравено од навивачите како вистински потег на управата, бидејќи неговото искуство и лидерство ќе бидат од големо значење во Примера.