Постојат многу причини зошто луѓето одат во странство. Некои едноставно сакаат да патуваат и да запознаваат нови култури, додека други бараат подобра и побезбедна иднина. Живеењето во странство – без разлика дали некој е дигитален номад, патник или пензионер – не само што дава можност за нови искуства и запознавање на светот, туку може да биде и начин за значителни заштеди.

Додека трошоците за живот во некои земји се високи, во други животот е изненадувачки достапен. Дали знаевте дека постојат дестинации каде што е можно да се живее за помалку од 500 долари месечно (околу 428 евра)? Порталот World Wild Schooling издвои 12 такви места кои се привлечни и достапни – пренесе Телеграф.рс.

Сончев Брег, Бугарија – популарно одморалиште со сонце, море и забава. Стан на одлична локација може да се изнајми за помалку од 150 евра месечно, често со базен.

Варна, Бугарија – пристанишен град со песочни плажи и опуштена атмосфера на стариот град. Храната чини околу 270 евра месечно, а вкупниот буџет од 500 евра овозможува солиден живот.

Катманду, Непал – еден од најевтините градови во светот. Еден сам човек може да покрие кирија, комуналии, храна и превоз за околу 390 евра месечно. Опкружен со Хималаите, идеален е за љубителите на планинарење и култура.

Пај, Тајланд – шармантен град во Северен Тајланд, во долина покрај реката Пај. Изнајмувањето сместување преку Airbnb е можно за помалку од 300 евра, а готвењето дома ги одржува вкупните трошоци под 500 евра.

Мириса, Шри Ланка – мал крајбрежен град познат по своето тиркизно море и палми. Просечните месечни трошоци се околу 430 евра.

Куско, Перу – поранешна престолнина на Инките, сместување од 170 до 250 евра месечно. Градот на 3.399 метри надморска височина, опкружен со Андите, нуди историја, природа и локална кујна.

Бали, Индонезија – популарен по своите оризови полиња, вулкански пејзажи и разновидна култура. Удобен живот е можен за помалку од 500 долари месечно.

Маракеш, Мароко – средновековен град познат по своите пазари и архитектура. Сместување од околу 250 евра месечно.

Валона, Албанија – покрај Јадранското Море, со ниски трошоци за живот. Со паметно планирање, живеењето за 500 евра месечно е можно.

Саранда, Албанија – плажи и прифатлив сместувачки капацитет. Станови околу 250 евра месечно, вклучени комунални услуги, остатокот од буџетот ги покрива другите трошоци.

Гоа, Индија – вкупни месечни трошоци околу 455 долари (под 400 евра). Поранешна португалска колонија со мешавина од индиска и европска култура.

Лангкави, Малезија – најголемиот остров во архипелагот со исто име, популарен меѓу дигиталните номади. Вкупни трошоци за живот околу 420 евра месечно.