Законот пропишува дека службено лице може да остварува приходи од научни, наставни, културни, уметнички и спортски активности и приходи од авторски, патентни и слични права, интелектуална и индустриска сопственост, но не и од консултантски услуги.

Обвинителката Вилма Русковска, ја потврди истрагата, и не откри детали дали станува збор за поголема афера во која Дончев е вмешан.

-Да, се води истрага, потврди денеска шефицата на Обвинителството за организиран криминал и гонење на корупција, Вилма Русковска, одговарајќи на новинарско прашање.

Управата за финансиско разузнавање, по барање на Обвинителството за организиран криминал, утврдила дека Дончев во 2018 година добил 3 милиони денари или околу 50.000 евра од македонската компанија регистрирана за интернет-портали со седиште во Муртино „Ремаркет“, чии приливи пак доаѓале исклучиво од австралиската „Мегантик“.

Дончев давал услуги од областа на маркетингот и подобрување на бизнис процесите на македонската фирма „Ремаркет“ со седиште во село Муртино која го продавала мислењето на австралиската „Мегантик“ со што Дончев се стекнал со 6 месечни плати или вкупно 50 илјада евра, велат за неделникот Фокус од „Ремаркет“.

-Моите примања од компанијата „Ремаркет“, врз основа на консултантски услуги што сум ги дал за австралиската „Мегантик“, се најуредно пријавени во Управата за јавни приходи и за нив е платен соодветниот данок, вели поранешниот директор на Фондот за здравствено осигурување Ден Дончев за неделникот Фокус.

Ден Дончев, пред десет дена си поднесе оставка од директорското столче во Фонд за здравство, а Владата ја прифати неговата оставка, која уследи, како што информираше Владата своевремено, поради приватни и семејни причини.

Името на Дончев се поврзуваше со аферата наречена „Рекет“ 2 во која сопственичката на „Диамед“ го обвини дека се обидел да спречи странска инвестиција да влезе во Македонија.