Осудениот поранешен судија на Врховниот суд, Наќе Георгиев, кој е осуден за земање поткуп, се вработил како магационер во фирма, што му овозможува денот да го поминува на работа, а навечер да се враќа и да преспива во затворот, објави „Скопје1“. Ваквата привилегија му е овозможена бидејќи издржа нешто една третина од тригодишната затворска казна.

„Осуденикот редовно користи погодности, викенд од три дена, излез од седум часа. Од денес е работно ангажиран во приватна фирма, со дадена согласност од директорот на Управата за извршување санкции“, вели директорот на затворот, Зоран Ристов за „Скопје1“.

Но, и изминатата година, тој користел поволности. Според информациите на „Скопје1“, Георгиев излегувал на викенди, кои му се давани согласно правилникот на затворот. Сите привилегии ги уживал, благодарение на доброто поведение.

Инаку, Георгиев се спогоди со Обвинителството за гонење организиран криминал и корупција по случајот за земање мито од синот на ексградончалникот на Ново Село, Боро Стојчев и прифати да му биде изречена казна затвор во траење од три години, како и Забрана за вршење професија, дејност или должност на службено лице во период од три години.