Една од најголемите платформи за педофили во светот „Кидфликс“ неодамна беше затворена во меѓународна операција против сексуалната експлоатација на деца. Истрагата беше поддржана од Европол и предводена од Баварската државна криминалистичка полиција и Баварската централна канцеларија за гонење на компјутерски криминал (ZCB)- пишува Политика.

Низ светот се уапсени 79 педофили, а во рамки на акцијата во Србија приведени се две лица – А.М.(28) и М.С.(35).

Европол објави дека 1,8 милиони корисници се пријавиле на платформата „Кидфликс“ ширум светот помеѓу април 2022 година и март 2025 година. На 11 март 2025 година, германските и холандските власти го запленија серверот, кој содржеше околу 72.000 видеа. Истрагата идентификуваше речиси 1.400 осомничени.

Досега 79 од овие лица се уапсени поради споделување и дистрибуирање на материјали за сексуална злоупотреба на деца. „Некои од уапсените не само што објавувале и гледале видеа, туку и злоставувале деца. Истрагата е во тек“, соопшти Европол.

„Кидфликс“ е создаден во 2021 година од сајбер криминалец кој оствари огромен профит, бидејќи брзо стана една од најпопуларните платформи меѓу педофилите. Според полицијата, на платформата додека била активна биле поставени и споделени 91.000 видеа, со вкупно времетраење од 6.288 часа. Во просек, на платформата се поставуваат околу 3,5 нови видеа секој час.

„За разлика од другите познати платформи од ваков вид, „Kidflix“ не само што им дозволуваше на корисниците да преземаат содржини, туку и да проследуваат видео датотеки. Корисниците плаќаа со криптовалути, кои подоцна беа претворени во токени. дозволувајќи им на педофилите да ја гледаат содржината и да платат надомест за отклучување верзии со повисок квалитет“, објаснуваат од Европол.

Исклучувањето на „Кидфликс“ е најголемата операција досега спроведена од експерти на Европол во борбата против сексуалната експлоатација на деца и имаше кодно име „Поток“.

За време на истрагата, аналитичарите на Европол им дадоа оперативна поддршка на националните власти со анализа на илјадници видеа. Тие, исто така, ги проверуваа сите достапни податоци и им дадоа докази на релевантните земји за да ја олеснат истрагата.

Сексуалната експлоатација на деца е една од клучните закани за внатрешната безбедност на ЕУ, се вели во неодамна објавениот извештај на ЕУ за проценка на заканите од сериозен организиран криминал. Дигиталната димензија ја поттикна брзата еволуција на онлајн педофилијата, обезбедувајќи им на престапниците платформа без граници за контактирање со жртвите, како и за создавање, складирање и споделување видеа. Овој тренд ќе продолжи да расте во наредните години, се вели во извештајот.

Онлајн светот не е анонимен. Идентификуваните во операцијата „Поток“ беа споредени со записите во базите на податоци на Европол. Утврдено е дека криминалците кои се занимаваат со онлајн педофилија и сексуална експлоатација на деца се претежно повратници.