Италијанската полиција денеска уапси 12 луѓе, меѓу кои и наводен експерт за заштита на децата, во акција против педофилијата и детската порнографија. Полицијата поднела обвиненија против уште 14 луѓе и запленила компјутери во кои имало десетици илјади фајлови со детска порнографија, пренесува „Анса“.

Биле извршени 26 рации на околу 20 места, меѓу кои и Рим, Венеција и Милано, откако биле следени 130 онлајн групи каде што прекршителите споделувале нелегален материјал.

Сите осомничени се мажи на возраст меѓу 22 и 69 години, вклучително и еден за кој се тврди дека е поврзан со програми за заштита на децата, но полицијата се сомнева дека тоа му било само алиби.

Акцијата со кодно име „Вајпер 2“ произлезе од тајната акција на специјалната полиција од Венеција, при која се уапсени 28 лица и извршени се 60 претреси.