Еден од осомничените во истрагата против групата „Беланоца/Барон“, Шенол Маслани, брат на Шенаси Маслани познат во јавноста како Шенки Версаче беше на контроверзниот список со помилувани лица што го потпиша претседателката Гордана Силјановска Давкова. На овој список се најде Аќиф Равманоски познат како Јусуф Аќифи, припадник на групата „Барон“, кој пред да биде помилуван пукаше во Арачиново и рани едно лице. Ова резултираше со оставка на Комисијата за помилување, а полицијата го уапси Аќифи веднаш штом беше ослободен од „Идризово“ за пукањето.

Според нашите неофицијални информации, Шенол не е меѓу приведените лица, а во притвор во Шутка, според потврдени информации завршија Шенки Версаче, неговиот брат Мирвет Маслани, Абдула Садики и Аќиф Мемиши. Едно од овие лица кои завршија во Шутка неофицијално бил возач на возилата со кои биле извршени убиствата, а друг е повратник од боиштата во Сирија.

Кривичниот суд вчера соопшти дека на барање на Обвинителството им одредил 30-дневен притвор на овие четири лица по сите основи, опасност од бегство, повторување на делото и влијание на сведоци, а определен е притвор и за уште пет други лица кои се дел од истрагата што ја отвори Обвинителството за гонење на организиран криминал и корупција против 18 лица, но се во бегство.

-Прифатен предлогот на ОЈО Скопје за определување мерка притвор за 4 лица кои вчера беа спроведени во судот во траење од 30 дена заради постоење на основите од член 165 ст.1 т.1,2 и 3 , како и предлогот за определување мерка притвор за 5 лица кои се недостапни на органите на прогон, притворот им е определен од нивно пронаоѓање, што се однесува до едно лице за кое се предлага притвор, а истото е веќе во затвор, дополнително ќе се одлучува со оглед на тоа што веќе е обезбедено во затворска установа – соопшти Судот.

Акцијата на полицијата против групата продолжила и синоќа во селата Орланци, Никуштак и во атарот на општина Арачиново.

-Биле пронајдени еден пушкомитралез, девет автоматски пушки, повеќе празни рамки за автоматска пушка и реденик за пушкомитралез, две рамки за автоматска пушка со куршуми, една тегла со муниција, ранец и други предмети. Пронајденото е предадено на вештачење во Одделот за форензички испитувања и се преземаат мерки за расчистување на случајот – соопшти МВР.

Водач на групата е Фатљум Ајети – Тоте, кој сега во Куманово издржува казна затвор за трговија со дрога и оружје и е син на претходниот водач на оваа група, Џељал Ајети – Џељо, кој беше ликвидиран во 2013 година.

Поголемиот дел од затворската казна, тој ја издржуваше во затворот „Идризово“ од каде често беше активен на социјалните мрежи, но сега е во затворот во Куманово.

Меѓу водачите на групата е Гани Туша, кој првично беше осомничен за вмешаност во двојното убиство во „Шиша бар“, кога беа убиени двајца водачи на групата „Дуќанџик“, а сега е во притвор за убиството на Орхан Бајрами – Оки исто така еден од поглавните луѓе на ривалската група и Зулќуфли Нуредини – Мали Репки кој е познат бегалец од затвор.

Групата била формирана во 2021 година кога Тоте е осомничен во полициска акција за сузбивање на криминална група која се занимавала со трговија со оружје, но не завршил веднаш во притвор.

Организаторите, според Обвинителството, подготвувале планови и носеле одлуки кој, каде, кога и на каков начин ќе биде ликвидиран од непријателската група и плаќале од 10 илјади до 250 илјади евра за убиство.

Освен убиства тие изнудувале и пари на месечно ниво, но им се плаќале поголеми износи и еднократно. Парите ги изнудувале насилно, со закани, но и со палење на угостителски објекти.

Групата „Беланоца“ и групата „Барон“ станаа актуелни по двојното убиство што се случи во март 2023 година кога беа убиени Јетон Кривањева – Жила и Енес Исеинов-Љаци од „Дуќанџик“. Ова е единствено официјално потврдено убиство со кое е поврзана групата, а кои се другите убиства со кои е поврзана оваа група, засега истражните органи немаат соопштено.