Се договоривме со минстерката за надворешни работи на Бугарија Марија Габриел многу брзо да имаме средба во Софија или во Скопје, најави македонскиот министер за надворешни работи Бујар Османи, одговарајќи на прашање за време на Преспа форумот дали на конференцијата има претставник од Бугарија.

– Од Бугарија има претставник од МНР. Зборував со министерката Габриел, ја поканив во Струга на форумот, но таа побара разбирање дека штотуку ја презела функцијата и се надева дека на наредните ќе присуствува. Се договоривме многу брзо да имаме средба во Софија или во Скопје – рече Османи.

На прашањето на бугарски медиуми дали резолуцијата што се усвојува во германскиот Бундестаг за поддршка на македонскиот идентитет значи повик до Бугарија во иднина да се воздржи од поставување на нови услови и дали Македонија планира да влезе во нов дијалог со Бугарија ако не се договори со опозицијата за уставните измени, Османи рече дека Бугарија повеќе не може да поставува нови услови.

– Преговарачката рамка е затворена, сè што има, има таму. Отварање на преговарачката рамката не е можно ниту на барање на нашата, ниту на вашата опозиција, така што треба да ја затвориме таа тема дека утре некоја бугарска влада може да каже имаме нов услов. Нема нови услови, затворена е рамката. Во преговарачката рамка имаме три патокази, во едниот од нив има акциски план за малцинствата, тоа е единствениот услов кој влезен во бенчмарковите за отварање и за затворање на поглавјата во преговорите со ЕУ. Тој акциски план не се однесува само на бугарската заедница, туку и на сите заедници во државата. Се разбира, треба да се исполнат условите да се обезбедат еднакви права на сите граѓани без разлика на етничката припадност – рече Османи.

Се разбира, додаде тој, дека договорот со Грција и договорот со Бугарја се во преговорарачката рамка во делот каде што се проценуваат добрососедските однос, но не се во делот со патоказите, каде е само акцискиот план.

– Ние не се надеваме дека со Бугарија ќе одиме со калкулатор, вие направивте ова, ние тоа. Се надеваме дека ќе изградиме односи каде добрата волја ќе го води процесот. Каде што ќе создадеме разбирање и почит еден за друг, наместо двете страни да бидеме со калкулторот во рака и да проценуваме кој што исполнил од договороеното. Јас на таков однос се надевам – рече Османи.

Во врска дали мотивите за нападот врз Бекир Кадриевски во Струга се етнички или политички, а за кој веќе имаше реакција од бугарското МНР, Османи рече дека институциите веднаш реагирале.

– Многу сум осетлив на тема говор на омраза по етничка основа, насилство од омраза, веројатно заради мојата историја како припадник на заедница која требаше да создаде доверба во ова општество. Многу луѓе се изненадија зошто јас толку брзо отидов во Софија кога беше инцидентот со Пендиков. Бидејќи прагот на сезитивност ми е многу низок, кога се однесува за говор на омраза на етничка основа и верувајте, не ги делам Бугарите од Албанците, од Ромите или од кои било други – рече Османи.

Тој потенцира дека ние сме држава која полека станува модел за меѓуетничка толеранција и нема да се дозволи никој да го урне тоа и дека побарале од бугарското општетсво и медиуми и од нашето општество и медиуми да не се избрзува со квалификации.

– Дајте да видиме што точно се случувало. Јас вчера, бидејќи во протоколот со Бугарија МНР е определено како прва точка на контакт за говор на омраза, контактирав со МВР, со Владата и со сите институции дека не смееме да доцниме ниту час во расчистувањето на случајот и институциите така и постапија. Сега имаме две варијантни, едната е на напаѓачот, другата е на нападнатиот, кои се сосема различни. Да почекаме Обвинителството овие денови да ги расчисти, а после тоа, ако има елементи на омраза јас ќе реагирам многу повеќе од кој било бугарски политичар, бидејќи тоа е прашање за кое ние нема да дозволиме да стане тренд и тие појави ќе ги уништиме во зародиш. За етничка омраза, говор на омраза, нетолеранција на етничка основа нема место во оваа држава. Да не дозволиме да се исполитизира овој случај, оти даваме лоши пораки при секој инцидент некој утре да се повикува на етничка омраза и да бара заштита и затоа мора да бидеме внимателнии – рече Османи.

Средбата на Османи со колешката Габриел би била прва официјална билатерална средба по подолго време, затоа што Бугарија речиси цела година е со техничка влада. Во тој период односите меѓу двете земји значително се влошија, со отварањето на бугарските клубови, нападите на клубовите, чествувањето на годишнината од раѓањето на Гоце Делчев, заканите од бугарски европратеници кон претседателот Стево Пендаровски, претепувањето на Христијан Пендиков итн. А претходно бугарската влада на експремиерот Кирил Петков и македонската влада предводена од Димитар Ковачевски договорија значителна билатерална соработка со пет работни групи во повеќе области, кои интензивно се среќаваа до падот на владата на Петков минатото лето. Се очекува дека таквата соработка ќе продолжи, откако Бугарија неодамна избра влада која во наредните девет месеци ќе ја предводи Николај Денков од партијата Промената продолжува на Петков.

Османи неодамна по изборот на бугарската влада рече дека е оптимист дека ќе се подобрат односите со Бугарија затоа што луѓето со политички мандат и одговорност пред граѓаните имаат поинаков поглед кон односите во регионот, за разлика од луѓето кои не добиле мандат и немаат политичка обврска пред гласачите. Според него, недостатокот на политичка влада во Бугарија беше еден од факторите за тешките односи со Бугарија во изминатиов период.

Неодамна и премиерот Димитар Ковачевски најави дека министерот Османи и вицепремиерот за евроинтеграции Бојан Маричиќ ќе ги продолжат средбите со Софија.

– По формирањето на новата влада тензиите спласнаа. Не сум комуницирал со новиот премиер освен што му честитав на премиерската функција. Министрите Маричич и Османи ќе имаат состаноци со нивните колеги, за да зборуваат за иднината, пти досега зборувавме само за минатото – рече неодамна Ковачевски на брифинг со новинарите.