Од Општина Охрид, во пресрет на главната летна туристичка сезона, упатија јавен повик до сопствениците на кајчиња и останати пловни објекти, да ги отстранат пловилата од крајбрежниот појас на езерото на потегот кај Сараиште во Стариот дел на градот и долж крајбрежјето на туристичката населба Пештани.

Според локалната самоуптава, доколку сопствениците самите не ги отстранат пловните објекти поставени на јавните површини кои се предвидени за рекреација на туристите, тоа ќе го сторат општинските јавни претпријатија, а трошоците за релоцирањето ќе паднат на товар на сопствениците.

Во повикот се нагласува дека причината за отстранување на пловните објекти е поради тековно одржување и чистење на крајбрежјето во овој дел од градот, со цел непречено користење од страна на жителите и туристите, појаснуваат од Општина Охрид.