Градежен инспектор од Секторот за инспекциски работи на Општина Центар, денес  извршил вонреден инспекциски надзор и затворил градилиште на булеварот „Никола Карев“, информираат од Општина Центар.

– При надзорот, констатирано е дека се работи за непознат инвеститор и се гради објект за кој нема издадено одобрение за градба од страна на општината. Градежниот инспектор по увидот и затворањето на градилиштето донесе решение за отстранување на нелегалната градба, во законски предвиден рок. Доколку истата не биде отстранета, општината ќе пристапи кон административно извршување на објектот, за кое трошоците ќе паднат на товар на инвеститорот – стои во објавата на оваа локална самоуправа.

Од Општина Центар апелираат до сите инвеститори и сопственици, како што велат, да ја поседуваат целосната документација при почеток на градба.

Доколку поседуваат решенија за отстранување на нелегални објекти самите да постапуваат по истите. Во спротивно, општината присилно ќе ги отстрани, со што трошоците за отстранувањето ќе паднат на товар на инвеститорите, односно сопоственците на нелегално поставените објекти – децидни се од Општина Центар.