Општина Центар ќе подели 3.000 новогодишни пакетчиња, донација од општествено одговорни компании. Станува збор за најголема бројка што општината ја поделила досега, информираа од Одделението за односи со јавност.

– Градоначалникот Горан Герасимовски подели новогодишни пакетчиња за децата од Центарот за Даунов синдром. Ова е прв Дневен центар во државата, отворен во соработка со здруженијата на децата со Даунов синдром и комплетно одговара на потребите на децата за поддршка на нивниот психофизички развој – се наведува во соопштението.

Герасимовски истакнувал дека новогодишните пакетчиња се само мал гест што донеле огромно задоволство кај сите.

– Од овие деца треба да научиме дека радоста е во малите работи. Им благодарам за убавиот пречек и внимателно изработените честитки – нагласил Герасимовски.

Од општината потсетуваат дека деновиве, Герасимовски и општинската администрација поделиле пакетчиња во Дневниот центар за церебрална парализа во „Киро Глигоров“, Детската клиника, Заводот за рехабилитација на слух, говор и глас, Здружението на слепи лица со оштетен вид, Институтот за белодробни заболувања кај децата – Козле, Здружението на граѓани за хуманитарна помош „Заеднички дом за мајки и деца од Украина“, Дневниот центар за лица со попреченост над 18 години „Пролет“, Центарот за Даунов синдром и дека се делат пакетчиња во детските градинки.

– Новогодишни пакетчиња ќе бидат поделени и на дводневната предновогодишна забава, што Герасимовски ја најави за 29 и 30 декември на улицата „Боемска 1“ – пишува во соопштението.