Општина Битола ќе формира Совет за поддршка на женското претприемништво кое ќе ги претставува и застапува интересите на актуелните и потенцијални жени претприемачки и нивно економско зајакнување.

Советот за поддршка на женското претприемништво ќе има за цел да креира стимулативни програми за започнување на нови бизниси на жените кои имаат желба да започнат своја претприемачка приказна.

– Имајќи ја предвид улогата на жената во современите економски процеси, се залагаме за создавање на поволно деловно опкружување и обезбедување поддршка за развој на претприемачкиот потенцијал на жените, со што ќе се придонесе кон развојот на постојните и креирање на нови претпријатија, на нови работни места, а со тоа и јакнење на целокупната економија, како и промовирање на квалитетни примери на жени претприемачи со цел зајакнување на женското претприемништво и придонес за зголемување на видливоста и опфатот на платформата преку активно промовирање на позитивните примери за овозможување родова еднаквост-информираат од Битолската локална самоуправа.

Ана Ристевска сопственик и управител на „Јавен адвертајзинг“ софтверска компанија и верифициран образовен центар вели дека Советот за женско претприемништво како иницијатива требаше многу порано да се формира, бидејќи токму едно вакво тело е потребно на локално ниво се со цел да се мотивираат жените да отворат свој сопствен бизнис, да работат добро и да напредуваат.

Преку Советот, жените претприемачи кои веќе дејствуваат на пазарот, можат да пренесат добри практики, но исто така да ги мотивираат жените што се заинтересирани да отворат сопствени бизниси. Советот исто така може да поттикне и дополнителни обуки преку кои би се обучиле од финансиска, оперативна и од менаџерска гледна точка. Исто така би се повеле најразлични иницијативи преку фондови од каде што може да се црпат дополнителни финансии за да се помогне развојот на бизнисот-вели Ристевска и додава дека после неколку години успешна работа нејзината компанија во која 80 проценти од вработените се жени се успешно етаблирани на пазарот не само во Македонија туку нивната работа е препознатлива и на интернационално ниво. Но, како што додава Ристевска и таа како жена во бизнисот се соочувала со предрасуди.

– Јас како жена во ИТ секторот го почувствував на своја кожа тој потценувачки однос кон жените во ИТ технологијата што владее на глобално ниво. Се смета дека во овој бизнис мажите знаат повеќе од жените. Но, сепак со фактот што се повеќе жени се на раководни позиции во ИТ секторот, сите тие предрасуди се побиваат. Јас како жена на почетокот го почувствував тоа, тешко доаѓав до клиенти. Но, токму мојата упорност заедно со мојот тим и успесите на локално ниво ми овозможија да се закитам со европската награда „40 под 40“ која ми беше врачена во Истанбул за најуспешни бизнис лидери под 40 години на ниво на Европа – додава Ана Ристевска сопственик на фирмата „Јавен адвертајзинг“.

Граѓанските организации имаат голема улога во поттикнувањето на женското претприемништво со цел креирање политики, застапување и соработка со националните и локалните власти.

Лидија Ангелкова од фондацијата „Преда плус“ вели дека оваа платформа со Советот за женско претприемништво е добра, бидејќи во Македонија има мноштво програми кои можат да дадат поддршка за развој на бизнисите и пристап до фондови за финансирање на тие бизниси.

– Преда плус е фондација за одржлив економски развој која за само 5 години успешно реализираше 7 стартап програми со 152 индивидуалци коишто развија 85 бизнис идеи. Во сите програми на нашата фондација се посветува внимание на поддршката на женското претприемништво и ги поттикнуваме жените претприемачи. Кај стартап програмите на „Преда плус“ 46 проценти од учесниците се жени. Овој Совет го гледам како платформа преку која жените меѓусебно ќе се мотивираат. Жените претприемачи преку настаните што ги организиравме „Од Битола се може“ во делот „И таа може“ споделуваа успешни бизнис приказни. Но, и споделуваа искуства дека најголемиот предизвик со кој се соочуваат жените претприемачи е балансот меѓу домашните обврски и професионалниот ангажман. Оттука, треба многу да се работи на родовата еднаквост во општеството, за родовите улоги, особено на поделбата на трудот во домот. Домашните обврски за трипати повеќе ги извршуваат жените и тогаш тие имаат се помалку време за професионален развој-вели Ангелкова и додава дека помалку од 30 проценти од жените во Пелагонија се на раководни позиции.

Инаку, според искуствата на фондацијата „Преда плус“ најзрела возраст за претприемачи е околу 40-тата година, бидејќи тогаш тие имаат најголемо искуство и самодоверба за започнување на сопствен бизнис.