ОпенАИ ќе го именува поранешниот шеф на Твич за нов извршен директор
ОпенАИ, наводно, ќе го именува Емет Шер за привремен извршен директор само 48 часа по хаотичното отпуштање на ко-основачот Сем Алтман.
Препорачано
Одборот го разреши Алтман во петокот, велејќи дека ја изгубил довербата во него и ја именуваше главната директорка за технологија на ОпенАИ, Мира Мурати, за привремена извршна директорка, пишува Би-Би-Си.
Но, сега се чини дека Шер е најновиот шеф на компанијата. Алтман помогна во лансирањето на фирмата која го создаде популарниот бот Четџипити. Постојат шпекулации дека тој би можел да се врати, наводно по реакцијата од персоналот и инвеститорите.
Но, во неделата навечер, одборот на ОпенАИ соопшти дека „цврсто стои на својата одлука како единствен пат за унапредување и одбрана на мисијата на ОпенАИ“, се вели во соопштението, пренесува Њујорк Тајмс.
Во понеделникот, извршниот директор на Мајкрософт, Сатја Надела, објави на Икс, поранешен Твитер, дека Алтман и Грег Брокман – уште еден ко-основач кој се откажа во петокот како претседател на компанијата – ќе му се придружат на Мајкрософт за да водат „нов напреден тим за истражување на вештачката интелигенција“.
Надела, исто така, го потврди назначувањето на Шер за главен извршен директор на ОпенАИ, пишувајќи: „Со нетрпение очекуваме да се запознаеме со Емет Шер и новиот лидерски тим на ОпенАи и да работиме со нив“.
Шер е поранешен шеф и ко-основач на платформата за видео стриминг Твич. Во белешката до персоналот на ОпенАИ се вели дека тој има „уникатна мешавина на вештини, експертиза и односи што ќе го поттикнат ОпенАИ напред“.
Во петокот, кога ОпенАИ објави дека го отпушта Алтман, го обвини дека не е „константно искрен во комуникацијата со одборот, што ја попречува неговата способност да ги извршува своите одговорности“.
Алтман се смета за една од највлијателните фигури во брзорастечкиот генеративен простор за вештачка интелигенција и неговото отпуштање предизвика шок низ индустријата.
Неговото соборување предизвика излив на поддршка од шефовите на Силиконската долина, вклучувајќи го и поранешниот извршен директор на Гугл, Ерик Шмит, кој го нарече Алтман „херој“ и рече дека тој „засекогаш го променил нашиот колективен свет“.
