Еколошкиот криминал не смее да стане исплатлив „бизнис“ кој ќе поминува неказнето или со благи парични казни, се сложуваат експертите од оваа област кои очекуваат и обвинителството поактивно да се вклучи во процесирањето на овие тешки кривични дела против животната средина, здравјето и квалитетот  на животот на граѓаните, за да добијат судска разрешница.

Кривичната пријава која Државниот инспекторат за животна средина (ДИЖС) до Основното јавно обвинителство ја поднесе кон крајот на минатата година против фирмата Рецикл Еко-Старт од Чучер Сандево за депонираниот отпад на приватен плац во скопското село Орман е во фаза на предистражна постапка.

-Јавен обвинител по приемот на кривичната пријава издаде наредба до МВР за преземање определени дејствија. По наредбата е постапено и доставени се побараните податоци кои се анализираат, соопштија од ОЈО за „Слободен печат“.

Околу 600 тони опасен отпад беше откриен од инспектор од Општината Ѓорче Петров во октомври минатата година, по што случајот го презеде Државниот инспекторат за животна средина.

Опасната згура од преработка на акумулаторски батерии најмалку шест месеци претходно бил транспортиран во Орман од фабриката за преработка на стари акумулатори Таб Мак од Пробиштип која заработи парична казна од 88.000 евра.

Отпадот по наредба на инспекторатот е целосно вратен во кругот на фирмата во Чучер Сандево и во меѓувреме инспекторите редовно ја контролираат состојбата на терен, откако фирмата пред еден месец доби измена на А-интегрираната дозвола за преработка на отпадна троска од олово. Згурата сега се складира во бетонски базени со заштитна фолија, а потоа со физички процеси се прави сепарација на оловото и се топи во печки.

 -Сопственикот на плацот во село Орман кадешто е откриен отпадот исто така има обврска преку акредитирана лабораторија да направи анализа дали земјиштето е контаминирано, по што ќе може да се тампонира. Ја следиме состојбата, уште еден инспекциски надзор ќе има до крајот на месецот, изјави  Дарко Блинков, генерален инспектор за животна средина од ДИЖС.

Оттаму очекуваат јавното обвинителство да ја прифати поднесената кривична пријава против фирмата од Чучер Сандево за загрозување на животната средина и природата со отпад по член 230 став 2 од Кривичниот законик за да може да се процесира во судовите овој еколошки криминал откриен пред повеќе од шест месеци, за кој е запретена затворска казна од три месеци до три години.

Според експертите, Државниот инспекторат за животна средина е една од посилните алки во ланецот надлежни органи кои се бават со сузбивање на еколошкиот криминал, иако не е доекипиран целосно, работи со добро обучени инспектори според стандардни оперативни процедури, но, за да се процесуираат до крај еколошките кривични дела потребни се обуки и за јавните обвинители и судиите за препознавање на овој специфичен вид на криминал, како и посебен оддел во МВР со инспектори обучени за сузбивање на криминалот врз животната средина.

ВИДЕОИНТЕРВЈУ | Проф. Малиш Саздовска: За ефикасното сузбивање на еколошкиот криминал потребен е посебен оддел во МВР