Лидерот на курдските бунтовници во Турција, Абдула Оџалан, најавил дека е спремен од затворската ќелија да ги повика милитантите од Работничката партија на Курдистан да го положат оружјето.

Ова го тврдат двајца пратеници од прокурдската партија ДЕМ, кои вчера го посетиле Оџалан во затворот на островот Имрали во Мраморно Море, каде што ја отслужува казната доживотен затвор поради тероризам.

Иницијативата за крај на 40-годишните судири на турските сили за безбедност со ПКК ја дал Девлет Бахчели, лидерот на екстремната десничарска Партија за националистичка акција (МХП), а била прифатена од претседателот Реџеп Таип Ердоган, кој ја нарекол „историска можност“.

На првата средба по десетина години со претставници на прокурдската партија, Оџалан наводно изразил спремност „да ги преземе потребните позитивни чекори и да го објави повикот“.

Тој додал дека развојот на настаните во Газа и особено во Сирија покажуваат дека „прашањето на Курдите повеќе не може да се заобиколува“.