Женската сениорска одбојкарска репрезентација на Македонија го затвори квалификацискиот циклус за Европското првенство 2026 со нов пораз, овојпат од Австрија со 0-3 (19-25, 23-25, 10-25).

Нашите одбојкарки најголем отпор пружија во вториот сет, кој се играше поен за поен и се решаваше на разлика, но на крајот не успеаја да го изненадат поискусниот противник.

Тамара Стојанова повторно беше лидер во нападот со 13 поени, а двоцифрен ефект имаше и Теа Терзиевска со 10 поени.

Македонската селекција ги заврши квалификациите без победа, со четири порази на исто толку натпревари во групата Ф, што значи крај на надежите за пласман на континенталниот собир.