Подната фонтана на градскиот плоштад во Скопје не само што не работи со години, туку од неа се останати само плочки, па и тие се расклатени. Механизмот на фонтаната е расипан и оставен така откако во неа на неколку наврати пропаѓаа камиончиња, по што, за да се сочува откако веќе немаше што да се чува, околу неа се поставија бетонски топки и жардиниери со зеленило. На плочките што ја покриваат фонтаната и од кои прскаше вода и беше осветлена во најразлични бои, сега се извадени светлата, па на повеќето од нив зјаат само дупки.

Изградбата на фонтаната, која како и другите фонтани на плоштадите „Македонија“ и „Филип Втори“, беше дел од проектот „Скопје 2014“, чинеше 2,5 милиони евра, но ниту потрошените пари очигледно не се доволна причина за надлежните да ја обноват и да ја одржуваат.

Фонтаната беше пуштена во употреба во 2015 година и претставуваше атракција за децата, кои секое лето трчаа низ водените водоскоци. Покрај тоа, на „голиот“ плоштад, на кој само од страните има понекое дрво, нејзиното прскање претставуваше вистинско освежување во летните горештини. Сега таа стои сува, оградена со бетонски топки и саксии како уште еден доказ дека во градов не може да се сочува ниту тоа што е веќе направено.

„Животот“ на подната фонтана траеше многу кусо. Во 2017 година во неа пропадна камион додека се подготвуваше бината за пречек на ракометарите на Вардар по освоената титула на Европското првенство. Две-три години подоцна во неа пропадна возило на „Комунална хигиена“ чистејќи го плоштадот Македонија и оттогаш фонтаната не работи.

 Веќе ништо не ме изненадува во градов, ќе ме изненади ако видам дека нешто добро се прави. Погледнете околу и ќе разберете за што зборувам. Никој за ништо не се грижи. Ќе се потрошат еден куп пари од буџетот, народни пари, и никому ништо. Одржување нула. Фонтаната беше најубавиот дел од „Скопје 2014“, ја оставија така расипана и никому не му грижа. Страшно и срамно. Ја оградија откако се уништи. Сега што чуваат, плочките? – вели Дамјан С., жител на Аеродром, со кого поразговаравме на плоштадот.

По четири години „суша“, подната фонтана повторно ќе прска – кога, не се знае!

Според него, ова што се случува во Скопје е пример што ретко се среќава во европските земји.

Јас работам тука во близина на плоштадот и секојдневно гледам што се случува. Ај што подната фонтана не работи неколку години, но што прават со другава, со „Воинот на коњ“? Навечер ја исклучуваат, па ја пуштаат повторно околу 10-11 часот наредниот ден. Зошто е потребно тоа пушти-исклучи? Па и таа повеќе ниту свети ниту свири, на оградата ѝ недостасуваат плочки, што да речам, катастрофа – вели соговорникот.

Обврската за одржувањето на фонтаните уште пред неколку години, Град Скопје, кој е сопственик на фонтаните, му ја префрли на ЈП „Водовод и канализација“. Претпријатието ги одржува 12-те фонтани во централното градско подрачје, што значи дека освен подната фонтана во негова надлежност се и фонтаната „Воин на коњ“, како и оние кај црквата „Света Богородица“, „Свети Ѓорѓија“, на плоштадот „Филип Втори“ и други.

Во врска со подната фонтана, минатата година оттаму кусо одговорија дека ќе биде поправена во најскоро време. Пред три години, оправдување зошто фонтаната не работи им беше дека активностите се одложени поради ковид-пандемијата. Но, тогаш посочија дека е направена процена на оштетувањата и процена за тоа колку би чинела санацијата и ветија дека фонтаната ќе биде обновена штом заврши пандемијата со корона. Пандемијата помина, но фонтаната остана непоправена.

Сега, не побаравме одговор од јавното претпријатие кога и дали планираат конечно да ја санираат фонтаната, затоа што во инвестициската програма за 2025 година, како и во програмите за инвестиции за изминатите неколку години, воопшто не се предвидени пари за оваа намена. А ако нема пари, јасно е дека нема да има ни нејзина обнова.