Еден миг се претвори во кошмар за моето дете. Петарда беше намерно фрлена во негова близина. Не беше тоа случаен настан, туку чин кој следеше со потсмев кон него поради неговата реакција, потег кој го засегна најчувствителниот дел од неговата душа. Леон, дете со аутизам, нежно дете, со својата сензитивност која го прави посебен, беше преплашен. Во тој момент ги затвори ушињата и почна да плаче, солзите му течеа како река, изразувајќи страв што зборовите не можат да го опишат. Се упати со силен писок кон мене, бегајќи од местото каде што беше фрлена петардата, барајќи заштита, прибежиште, мир. Со раширени раце го прегрнав, а тој се стутка во моите гради, како да сака да се скрие од светот. Телото му беше вкочането од шокот, а силното срцебиење ја оддаваше неговата внатрешна борба меѓу стравот и надежта дека е на сигурно. Овој момент ми го скрши срцето.

Оваа порака на мајка на дете со аутизам која стана вирална по социјалните мрежи пред Нова година, сепак не стигна до секого, па на новогодишната ноќ, а и по неа, Скопје и другите градови во Македонија личеа на бојно поле. На новогодишната ноќ, тринаесетгодишно дете остана со траен инвалидитет на раката по пукање петарди. Детето било примено на скопскиот Ургентен центар.

Клиниката за хируршки болести „Св. Наум Охридски“ на новогодишната ноќ, за среќа немало пациенти со повреди од петарди или други пиротехнички средства. Иако немало повредени во оваа болница ни на 31 декември, ни на 1 јануари, последниот месец, биле хоспитализирани педесетина пациенти, најмногу малолетници со повреди од петарди, огномети и други слични запаливи средства.

Директорот на Клиниката „Св. Наум Охридски“, Небојша Настов за „Слободен печат“ вели дека месецот пред Нова година имало дете со ампутиран прст, експлозивни рани и скршеници на десната рака.

На јануари полицијата објави дека запленила 13 илјади пиротехнички средства ставени на импровизирана тезга во скопско Синѓелиќ и приведоа едно лице.

-На 31.12.2024 полициски службеници од Единицата за недозволена трговија при СВР Скопје во с.Синѓелиќ ги лишија од слобода Џ.А.(29) од с. Синѓелиќ и Л.А. (33) од Скопје. Кај Џ.А., на импровизирана тезга, пронајдени се 8598 пиротехнички средства, а кај Л.А. 4641 пиротехнички средства. По документирање на случаите, ќе бидат поднесени соодветни поднесоци, соопшти МВР.

Од Министерството за внатрешни работи за „Слободен печат“ велат дека само во текот на декември годинава пронајдени и одземени биле 137. 096 петарди, 293 огномети и 167 ракети, за што дополнително ќе бидат преземени мерки. Всушност во декември биле запленети повеќе од двојно петарди отколку во текот на целата година.

-Во периодот од 01 јануари, заклучно со 30 ноември 2024 година евидентирани се 25 кривични пријави со кои се откриени 25 кривични дела од овој домен, при што во рамки на истите запленети се вкупно 52.806 парчиња петарди, 116 огномети и 166 пиротехнички ракети, објаснуваат од Министерството за внатрешни работи.