Земјите од таканаречената „Коалиција на волните“ разгледуваат три можни опции за распоредување на своите сили во Украина како дел од обидот за решавање на украинската криза, пренесува ТАСС, повикувајќи се на германското списание „Шпигел“.

Според овој извор, првата опција предвидува испраќање набљудувачка мисија за следење на спроведувањето на евентуалниот мировен договор. Сепак, ова сценарио се смета за малку веројатно бидејќи не обезбедува доволно безбедносни гаранции за Киев.

Втората опција, која земјите-членки ја сметаат за пореална, е испраќање западен воен персонал за обука на украински регрути. Планот предвидува дека до 150.000 војници би можеле да бидат обучени на овој начин годишно, наместо сегашните 90.000, а дел од обуката би се спроведувала и во Полска. Присуството на инструктори нема да има директен ефект на одвраќање, но, според очекувањата на коалицијата, би претставувало еден вид гаранција за Украина.

Третата опција предвидува обезбедување безбедност по целата линија на фронтот, што би барало распоредување на повеќе од 150.000 војници. Таквото сценарио веќе се смета за нереално од Франција и Обединетото Кралство.

Овие планови ќе бидат подетално разгледани денес во Париз, на состанок во „мешан формат“, на кој ќе присуствуваат францускиот претседател Емануел Макрон, украинскиот лидер Володимир Зеленски, германскиот канцелар Фридрих Мерц и други функционери. Се очекува дека на овој состанок ќе бидат претставени и конкретни опции за продолжување на решавањето на вооружениот конфликт во Украина.

Меѓународната „Коалиција на волните“ вклучува околу 30 земји, а нејзините активности се координирани од Франција и Обединетото Кралство.