Законот за заштита од пушење во Тетово не се почитува, одамна е заборавен од правните субјекти, граѓаните и институциите.

Ретко може да се најде угостителски објект каде не се пуши, а да биде катастрофата уште поголема, цигари се пушат и по здравствени установи и институции.

Непушачите во зимскиот период најчесто седат дома, оти за нив „нема место“ во угостителските објекти, или пак се гушат во затворените зачадени простории заедно со пушачите.

„Во Тетово можеш да се видиш со пријателите во некое кафуле само на лето, зборам за тие што се непушачи, оти во секој угостителски објект се пуши. Мора да има поголема контрола од страна на службите во однос на почитување на Законот за заштита од пушење, оти и ние сакаме да излеземе, а не можеме, конкренто јас не излегувам да се гушам во тие зачадени простории. За новогодишните празници бев во еден угостителски објект да не го именувам, немаше маса каде што не се пушеше, утредента цел ден имав главоболки“, раскажува еден тетовец.

Државниот пазарен инспекторат денеска соопшти дека минатата недела казниле 56 угостителски објекти и казина во кои се пушело цигари.

Како што велат од инспекторатот, во деновите по празниците, односно од 10 и 14 јануари, биле извршени над 200 инспекциски надзори на територија на цела држава во согласност со надлежностите кои ги имаат од Законот за заштита од пушење.

„Државниот пазарен инспекторат воспоставува мост помеѓу економските оператори и потрошувачите преку подиректно информирање и со цел превенирање на причините за намалување на последиците. Во периодот по завршување на новогодишните празници Државниот пазарен инспекторат ќе ги интензивира контролите со искористување на своите капацитети“ сe наведува во нивното соопштение.

Од вкупно 200 инспекциски надзори и 56 казни, од Одделението за инспекциски надзор во Тетово при Државниот пазарен инспекторат за „Слободен печат“ велат дека на тетовското подрачје биле извршено само 8 инспекциски надзори, а казнето е само едно правно лице.

Извршените надзори и казни не соодејствуваат со состојбата на терен

Д-р Ратко Давидовски од тетовскиот Центар за јавно здравје, вели дека е постојано очевидец дека во Тетово се пуши секаде од угостителсски објект па се до здравствени установи.

„Постојано сум очевидец  јас лично во угостителски објекти, а токму пред некој видов драстичен пример што ја отсликува состојбата. Жена со дете на отприлика две-три години дојде и влезе во делот за непушачи, но запали цигари. Иако ги опоменав во објектот ништо не се случи, иако локалот има и дел за пушење и дел за непушачи. Не се почитува Законот за заштита од пушење, особено последниве четири-пет години откако се направија некои популистички ретроградни мерки во однос на Законот за заштита од пушењето. Така што постојано сме сведоци дека во Тетово нема каде не се пуши, од угостителски објект, па сè до здравствени установи“, изјави д-р Давидовски.

Главен проблем е што самото население не е совесно и не го почитува законот, чија крајна цел е да ги заштити тие што не пушат.

Тој алармира и за негативните ефекти и последиците по здравјето од пушењето.

„Непушачите кога влегуваат во затворена просторија каде се пуши стануваат пасивни пушачи, што е и многу полошо, затоа што оние што пушат го имаат филтерот од цигарите, а непушачите го вдишуваат чадот без филтер. Ефектите по здравјето се страотни. Тука нема орган што не е нападнат од чадот од цигарите. Поради тие 70 канцерогени материи почнуваат проблемите – од обичен раздразнувачки ринит, па бронхит и до најголемата последица – карцином на белите дробови. Во пораст е во последно време, особено тука во Македонија. Го напаѓа кардиоваскуларниот систем, предизвикува мозочен удар, оштетување на кожата, предвремено стареење на кожата, така што нема бенефит. Има само зависност што претставува најнегативно нешто, има биолошка основа зависност од тутун.Често се зборува за загадување на воздухот со ПМ10, ПМ2,5 и тука поради пушењето мора да споменеме дека го имаме и внатрешното загадување на воздухот. На прво место од внатрешно загадување е чадот од цигарите, вели Давидовски.

Во Законот за заштита од пушење стои дека казната за правното лице е од 2.000 до 4.500 евра, за одговорното лице од 500 до 1.000 евра, а физичкото лице кое ќе биде фатено како пуши во затворен објект ќе биде казнето со 100 до 300 евра.