Граѓаните сè помалку носат маски на отворно или им се под брада, откако бројот на новозаразени од коронавирусот опадна. Сепак, наместо конкретен одговор дали ќе се укине оваа мерка, од Комисијата за заразни болести ни рекоа дека ќе одржат состанок следната недела и ќе решат какви мерки за заштита од коронавирусот ќе бидат активирани од 1 јуни.

– Одлуките се донесуваат врз основа на бројки и параметри, се анализираат сите достапни податоци, колку хоспитализации има и колку болнички кревети се слободни, се анализира смртноста, односно колкав е процентот на морбидитет во период од 14 дена – изјави за „Слободен печат“ д-р Жарко Караџовски, претседател на Комисијата за заразни болести.

Епидемиологот д-р Александар Стојанов, до неодамна директор на Центарот за јавно здравје и член на Комисијата за заразни болести, вели дека носењето маска на отворено нема ефект, бидејќи вирусот се пренесува доколку имате контакт со заразено лице подолго од 15 минути, и тоа на растојание од 1,5 метар.

– Одлуката да се носат маски на отворено беше донесена повеќе во контекст на стекнување навика кај граѓаните. Мое лично мислење е дека треба да се предложи укинување на оваа мерка. Ако се разминете со некој заразен на улица минимални се шансите да ве зарази. И бројките го дозволуваат тоа, затоа што секојдневно бележат континуиран пад. Неприфатливо е тоа што од граѓаните се бара да носат маски и на Водно кога пешачат или кога шетаат на Кеј на Вардар. Сепак, за во затворените објекти, кино-сали, автобуси, продавници, носењето маска треба да биде задолжително – вели Стојанов.

Мерките на Комисијата за заразни болести важат до 1 јуни и предвидуваат забрана за движење на населението од полноќ до 4 часот наутро, а угостителските објекти смеат да работат до 23:30 часот.