Почина Мајкл Кјарело, готвач познат по рестораните во Калифорнија инспирирани од италијанската кујна. Јавноста го познава и по телевизиското кулинарско шоу „Easy Entertaining With Michael Chiarello“, за кое беше награден со Еми. Кјарело беше дел и од познатите тв-емисии „Bravo’s Top Chef“ и „Top Chef Masters“. Имаше само 61 година, пишува „Пипл“ (People).

Славниот готвач починал во петокот во Медицинскиот центар „Квин оф Вали“ во Напа од алергиска реакција што резултирала со анафилактичен шок, соопштија од неговата компанија „Групо Кјарело“. Сѐ уште не се познати деталите за тоа како дошло до алергиската реакција.

„Длабоко жалиме за загубата на нашиот сакан патријарх Михаел. Неговата кулинарска брилијантност, безгранична креативност и непоколеблива посветеност на неговото семејство беа сржта на неговото битие“, се вели во соопштението на компанијата.

Кјарело, кој дипломирал на Кулинарскиот институт во Њујорк, го отворил својот прв ресторан „Toby’s“ во Мајами кога имал само 22 години. Тој продолжи да отвора ресторани во долината Напа и Сан Франциско, вклучувајќи ги рестораните „Tra Vigne Restaurant“, „Coqueta“,„ Ottimo“ и „Bottegu“.

Во 2008 година, „Bottega“ беше прогласен за најдобар дебитант ресторан на гастро-сцената од Загат, а Форбс (Forbes) и Ескавер (Esquire) го избраа како еден од најдобрите нови американски ресторани.

Уште во 1985 година, списанието „Food & Wine“ го прогласи Кјарело за готвач на годината, а во 1995 година доби награда од Кулинарскиот институт на Америка. Магазинот Ескавер (Esquire) го прогласи за готвач на годината за 2013 година.

Има објавено и голем број книги, меѓу кои „LiveFire Cookbook“, „The Tra Vigne Cookbook“, „Michael Chiarello’s Bottega“, „Michael Chiarello’s Casual Cooking“, „Napa Stories“ и „Flavored Vinegars“. Зад себе ја остави сопругата Ајлин и четири деца.