Во државниот буџет недостасуваат над седум милиони евра кои Агенцијата за одземен имот ги добила од продаден имот кој бил стекнат на незаконски начин, но не ги уплатила во буџетот.

Обвинителството за „СДК.мк“ информира дека е отворена предистражна постапка за огромната „дупка“, но и за други неправилности во работењето на Агенцијата и нејзините раководители во изминатите години, кои на почетокот на месецов ги откри Државниот завод за ревизија (ДЗР).

Овој имот е запленет со правосилни судски пресуди, зашто е стекнат со криминал и со него управува Агенцијата, која парите треба да ги уплаќа во државниот буџет.

„Анализата на остварените приходи од продажба на одземен имот и уплатените средства во Буџетот на државата реализирани од Агенцијата во период од 2011 до 30 септември 2024 година упатуваат дека од остварените вкупни приходи во износ од 1.650 милијарди денари, во Буџетот на државата уплатени се 1.205 милијарди денари, односно уплатени се 445 милиони денари помалку“, наведува Државниот завод за ревизија.

Ревизорите утврдиле и дека како неискористени парични средства на депозитната сметка на Агенцијата, на 31.12.2023 година се нашле над 40 милиони денари (околу 650.000 евра), кои не се уплатени во Буџетот на државата.

Во извештајот на Државниот завод за ревизија (ДЗР) има утврдено и многу други неправилности во работењето на Агенцијата.