Гаетан Дига бил згоден, духовит и полн со живот. Оние што го познавале зборувале дека бил убеден дека еден ден ќе стане ѕвезда. Станал познат, но од погрешни причини.

Во 1987 година, три години откако умрел од сида, неговиот лик можел да се види ширум Америка.

Идентификуван е како нулти пациент, првиот заболен одговорен за епидемијата која предизвикала смрт на 700.000 луѓе. Во еден наслов го опишале како „монструмот, кој нè зарази со сида“.

Стјуардот од францускиот дел на Канада никогаш не ги криел своите сексуални склоности, ниту пак се правдал поради својот сексуален живот. Спиел со дури 250 мажи годишно.

Но, за несреќа, бил обвинет неправедно поради бизарна комбинација на фактори.

Кон крајот на 70-те и почетокот на 80-тите години на минатиот век, Дига летал за авиокомпанијата „Ер Канада“, каде што имал прилика да запознае голем број сексуални партнери.

Американскиот центар за контрола на болести разговарал со неколку заразени во Калифорнија и во Њујорк во 80-тите години. Еден од нив рекол дека имал секс со стјуард со акцент, а другиот ја покажал визит-картата на Дига.

На Дига му се јавиле од центарот, а тој, за разлика од другите, покажал голема подготвеност за соработка: дозволил да му извадат крв и ги дал имињата на своите сексуални партнери.

Во белешките е запишан како пациент 57. Во 1984 година бил еден од 700.000 Американци кои умреле од сида.

Медиумите во 1984 година поврзале 40 пациенти врз основа на сексуалниот контакт. Дига прв од нив ги имал симптомите, а на графиконот е претставен како „нулти пациент“.

Тука неговата приказна би се завршила да не бил новинарот Ренди Шилтс, кој во 1987 година го објавил револуционерното дело за сидата „And the Band Played On“, кое ја поттикнало американската влада да вложи пари во истражување на болеста.

На едно место се спомнува „пациент зеро“ (нулти пациент), од кој наводно вирусот започнал да се шири и името Гаетан Дига. Медиумите експлодирале, неговото лице насекаде се појавувало и го опишувале како единствен одговорен за донесување на вирусот во Америка.

Вистината е дека нулти пациент никогаш немало. Наместо буквата „О“ (поради OUT of California), Центарот го забележил како Пациент 0 и оттука започнала целата забуна.