Нуклеарната централа Запорожје објави дека украинските сили извршиле напад со беспилотни летала врз зградата на центарот за обука во рамките на овој комплекс.

Според прес-службата, нападот е извршен со употреба на три беспилотни летала. Два детонирале над покривот на зградата, но не е предизвикана сериозна штета, ниту пак се повредени вработени.

„Нивото на позадинско зрачење на индустриската локација и соседната територија е во рамките на нормалните граници. Ограничувањата и условите за безбедно работење на енергетските единици на централата не се прекршени“, се вели во официјалното соопштение- пренесе Политика.

Во времето на нападот, експерти од Меѓународната агенција за атомска енергија (МААЕ) исто така биле присутни во центарот за обука и веднаш биле евакуирани на безбедна локација. Нивните животи и здравје не биле во опасност.

На 17 септември, мисијата на МААЕ веќе извести за гранатирање во близина на објектот и црн чад над блиските области, за кој се верува дека предизвикал пожар во вегетацијата.

Паралелно, нуклеарната централа Ростов извести дека е во постојан контакт со своите колеги во Запорожје и дека го следи развојот на ситуацијата по нападот.