Новиот претседател на Грузија, Михeил Кавелашвили, денеска помилувал 613 затвореници, во еден од неговите први извршни потези на функцијата, на која стапи на 29 декември, јавија грузиските медиуми.

Кавелашвили е поранешен фудбалер-интернационалец, кој играше за Манчестер Сити и за повеќе клубови во Швајцарија. Тој беше кандидатот на владејачката проруска партија „Грузиски сон“ на претседателските избори.

Како што пренесува „Грузија денес“, Кавелашвили на Фејсбук објави дека ги помилува затворениците по повод празникот Богојавление-Водици, врз основа на овластувањата што му ги дава Уставот, а кои се засноваат на принципот на хуманост и на државните интереси.

Како што се наведува во соопштението, помилуваните „се вратиле кај своите семејства и повторно ќе бидат полноправни членови на општеството“, пренесува ТАСС.

Кавелашвили беше избран за претседател на Грузија на 14 декември во Парламентот, со мнозинство гласови на комисија составена од 300 членови на парламентот и локалните самоуправи.