Професионалните новинарски здруженија и граѓанските организации од медиумскиот сектор упатија најостра реакција околу тоа како Министерството за информатичко општество и јавна администрација (МИОА) го води процесот на јавна дебата за  измени на Законот за аудио и аудиовизуелни медиумски услуги (ЗААМУ) со кои се предлага повторно воведување на т.н. државно рекламирање во земјава. Во реакцијата се наведува дека тие се против трошење на пари од државниот буџет за приватни медиуми, што во минатото се покажа како погубна за независната уредувачка политика на овие медиуми, исто така се и против законски решенија кои го фаворизираат само интересот на дел од од приватниот медиумски сектор и ја занемаруваат критичката улога на новинарството во демократијата и јавниот интерес на сите граѓани.

-Нагласуваме дека овие решенија се во целост спротивни на стандардите на Европската комисија, а особено на новата предлог – Регулатива за слободата на медиумите во која е јасно наведено дека европскиот пазар се нарушува со нетранспарентната и неправична распределба на јавни средства за државно огласување, особено кога тие средства преференцијално се доделуваат на водечки национални медиуми или се користат за тајно фаворизирање или субвенционирање на медиуми кои пренесуваат ставови блиски на актуелната власт – се наведува во соопштението.

Новинарските здруженија порачаа дека сакаат законски решенија кои ќе ја поттикнат разновдиноста на квалитетни содржини и ќе го поддржат независното и професионално новинарство и во непрофитниот и во приватниот сектор – а тоа, велат дека е можно преку воведување Фонд за плурализам на медиумски содржини.

-Ние располагаме со капацитети, знаење и меѓународни искуства да изработиме квалитетни предлози со кои ќе се подобри статусот на медиумските работници, ќе се опфатат сите чинители во индустријата без да се фаворизираат страни, а се со цел да се зајакне неоспорната независност на новинарската дејност. Особено загрижува тенденцијата со која Владата, од една страна, се договара и му ветува на приватниот медиумски сектор дека ќе ја воведе повторно оваа пракса, а од друга страна одговорноста за тоа што не е досега воведена ја префрла на здруженијата и организациите кои се конзистентни во принципиелниот став дека се против праксата со јавни пари да се плаќаат кампањи во приватните медиуми. Дополнително, овој предлог е изработен на нетранспарентен начин без експертска поддршка и затоа истиот треба да биде повлечен – велат тие.

Тие најавија дека денеска нема да учествуваат на јавната расправа што ја организира МИОА.

Соопштението е потпишано од Здружение на новинарите на Македонија (ЗНМ), Самостоен синдикат на новинари и медиумски работници (ССНМ), Совет за етика во медиумите на Македонија (СЕММ), Македонски институт за медиуми (МИМ), Институт за истражување на општествениот развој (РЕСИС), Здружение на регионални и локални медиуми „Медиум Објектив“, Институт за комуникациски студии (ИКС)