Глумицата Наја Ривера (33), позната по серијата „Glee“, во јули годинава се удави во езерото Пир во Јужна Калифорнија. Полицијата започна потрага по глумицата, откако нејзиниот 4-годишен син Хозе Холис Дорси бил пронајден сам на бродот.

По шестдневната потрага беше пронајдено телото на Наја. Длабочината на водата каде што беше пронајдена Наја била меѓу 10 и 18 метри и во тој дел имало многу дрвја. Обдукцијата утврдила дека немало знаци за насилна смрт ниту самоубиство.

Сега во јавноста излезе извештај во кој се откриени нови детали за несреќата.

Пред да скокнат од бродот во езерото, мајката и синот броеле до три, им кажал 4-годишниот Џои на истражителите, пренесуваат странските медиуми.

– Многу брзо откако скокнале во езерото, Наја му рекла на син ѝ да се врати на бродот и му помогнала да се качи на него. Потоа почнала да вика: „Помош!“ и мавтала со раката во воздух надевајќи се дека некој ќе ги види. Набрзо исчезнала под површината на езерото – се наведува во извештајот во кој пишува и дека вработениот во фирмата за изнајмување бродови ѝ нудел на Наја појас за спасување, но таа го одбила.

Тој потоа појасот го ставил во бродот, а неговото тврдење го потврдила полицијата која го нашла појасот за спасување на бродот.

Мајката на Наја изјавила дека нејзината ќерка знаела добро да плива. Во извештајот е откриена и содржината на нејзината торбичка – мобилен, шприц со розева течност, лична карта и пополнет рецепт за амфетамини.

Наја страдала од вртоглавици, па се претпоставува и дека состојбата ѝ се влошила во водата, а тоа довело до кобните последици.