Македонија ќе ја добие новата влада предводена од Христијан Мицкоски помеѓу Курбан Бајрам и Задушница, а во меѓувреме владејачката ВМРО-ДПМНЕ ќе го прослави и партискиот роденден на 17 јуни.
Новата влада да биде формирана до 20 јуни е начелниот договор за кој вчера си подале рака мандатарот Мицкоски и лидерите на „Вреди“ Изет Меџити, Арбен Таравари, Африм Гаши и Билал Касами и претседателот на ЗНАМ Максим Димитриевски, откако на средбата констатирале дека преговорите за владиното партнерство се завршени, брифираат за „Слободен печат“ од власта.

Како што веќе објавивме, коалицијата „Вреди“ добива прв вицепремиер и министер за екологија, а на таа позиција ќе седне Изет Меџити и вицепремиер за добро владеење Бујаре Абази. Во фотелјата на здравство најверојатно ќе седне Арбен Таравари, ресорот социјална политика ќе го предводи Фатмир Лимани, во новото министерство за економија и труд ќе биде Бесар Дурмиши, а во министерството за евроинтеграции Адмирим Алити. „Вреди“ добива и седум заменици министри и пет државни секретари.
ЗНАМ го добива ресорот правда и новото министерство за администрација, како и две заменик-министерски позиции. Со ЗНАМ уште се прецизираат директорските позиции.

Водечкиот партнер во владината коалиција ВМРО-ДПМНЕ, според висок партиски функционер, викендов треба конечно да пресече за кадровските решенија. Неофицијално, со ресорот финансии ќе раководи Гордана Димитриевска Кочовска, со МВР ќе раководи Панче Тошковски, а за МНР и одбрана во игра се Тимчо Муцунски, Александар Николовски, но и Владо Мисајловски, кој може и да заврши во транспорт и врски. Ресорот образование ќе го води Весна Јаневска, новото министерство за спорт Борко Ристовски, за култура и туризам – Зоран Љутков, Стефан Андоновски – за дигитализација, за земјоделие можно е да биде Цветан Трипуновски или тој ресор да оди кај социјалистите, а за енергетика – Тања Божиновска. За коалицискиот партнери на ВМРО-ДПМНЕ, односно за една од партиите на Србите е резервиран ресорот односи меѓу заедниците и за Ромите без ресор.

За да се комплетира владиниот кабинет и за да седнат идните министри во новите ресори, денеска во Собрание почна расправата за законот за реорганизација на министерствата. Според најавите од Собрание, можно е вечерва да биде донесен законот, ако на Комисијата за политички систем и на Законодавно-правната комисија нема предложени многу амандмани. Комисиските расправи за измените на законот беа закажани за 18 часот.

Според предлогот за измени на Законот за организација и работа на органите на државната управа, ќе се формираат четири нови министерства, а дел министерства ќе се прегрупираат, додека агенциите ќе се укинат. Ако поминат измените на Законот за кои е потребно двотретинско мнозинство, идниот владин кабинет ќе брои 20 министерства, наместо актуелните 16.

Според предлог-законот за вршење на функциите на државната управа се основаат: министерства за одбрана, за внатрешни работи, за правда, за односи меѓу заедниците, за надворешни работи и надворешна трговија, за европски прашања, за финансии, за економија и труд. Потоа – министерство за енергетика, рударство и минерални суровини, за земјоделство, шумарство и водостопанство, за здравство, за образование и наука, за социјална политика, демографија и млади, за локална самоуправа, за култура и туризам, министерство за дигитална трансформација, за јавна администрација, за транспорт, за животна средина и просторно планирање и министерство за спорт.

При утврдување на дневниот ред не беа прифатени барањата на пратениците Сашко Јанчев од Левица и Оливер Спасовски од СДСМ да се повлечат предложените измени на Законот за организација и работа на органите на државната управа. Спасовски рече дека не е дозволено по скратена постапка да се носи системски закон со кој се уредува зголемување на бројот на министерства и агенции.

На седницата беа верификувани мандатите на пратениците Аднан Азизи и Имрлије Салиу-Фетаи од коалицијата „Вреди“ и беше прифатен извештајот на Верификациската комисија која претходно на седница утврди дека нема основа за оспорување на верификацијата на нивните мандати. Азизи е пратеник на местото на тетовскиот градоначалник Билал Касами, чиј мандат на негово барање не беше верификуван на конститутивната седница, а Салиу-Фетаи доби пратенички мандат по прегласување на неколку избирачки места на 22 минатиот месец во Шестата изборна единица.

Апасиев побара да се констатира престанок на мандатот на Талат Џафери

Пратеникот од Левица Димитар Апасиев праша зошто претседателот на Собранието Африм Гаши не го ставил како точка на дневен ред барањето што го достави Левица – да се констатира престанок на мандатот на пратеникот Талат Џафери поради неспоивост на функцијата премиер и пратеник. Гаши рече дека барањето го примил на 4 јуни и веднаш го препратил до сите пратеници, но не и до собраниската Комисија за деловнички и мандатно имунитетни прашања, бидејќи составот сè уште не е избран.

– Во однос на содржината на барањето, ви укажувам дека Собранието не може да постапи бидејќи ова барање не е документ по кој ова Собрание може да констатира престанок на мандатот на Талат Џафери – рече Гаши.