Сезоната на годишни одмори започна сериозно и туристите годинава ги очекуваат поскапувања на сите дестинации во Грција. Пресметката покажува дека летувањето во Грција, каде годишно летуваат многу наши туристи, е во просек за 25 отсто поскапа од минатата сезона. Грција воведе и нови даноци кои треба да ги покријат штетите од екстремните временски услови, а се очекува само оваа година од овие приходи да инкасираат 300 милиони евра. Сите кои ќе одмараат во оваа земја од март до октомври можат да сметаат на плаќање на овие такси кои зависат од видот на сместувањето и се движат од едно до четири евра за ноќевање. Оние кои престојуваат во апартмани и хотели со една или две ѕвезди одвојуваат 1,50 евра, во хотели со три ѕвезди три евра, со четири ѕвезди седум, а во луксузни хотели 10 евра од ноќевање.

Поскапеа сместувањето, храната и патарините. Според грчките медиуми 0д 1 април значително поскапување на патарините има за автопатот „Егнатија одос“ каде патарините поскапеа и до 33 отсто. Според податоците на порталот „Никана“, патувањето од Солун до Атина, за стандарден семеен автомобил, ќе поскапи за 2,20 евра и ќе чини 33,55 евра.

На околу 500 метри од граничниот премин Евзони се наоѓа првата наплатна рампа каде патарината е 2,40 евра, а секој што ќе оди за Халкидики ќе плати дополнителна патарина на новата наплатна рампа, на обиколницата кај Солун, во износ од половина евро. Сите што одат на Јонското крајбрежје ќе треба да издвојат вкупно 16,90 евра за патарина низ Грција, доколку летуваат на Лефкада.

Оние кои годинава ќе одлучат да летуваат на релација Сивота-Парга-Врахос ќе платат вкупно 13,25 евра патарина во Грција, пишува оваа веб-страница. За туристите кои летово ќе летуваат во Солунскиот регион, односно во Ставрос, Аспровалта, Врасна… од годинава ќе има четири наплатни пунктови од влезот во Грција, а вкупната цена на патарините до Аспровалта е 7,45 евра. Туристите кои летуваат на Тасос и Кавала може да очекуваат пет наплатни пунктови, а вкупната цена на патарините во Грција за одење на Тасос годинава е 8,55 евра.

Она на што особено се предупредуваат возачите годинава се сообраќајните казни кои невнимателните возачи можат да ги чинат речиси исто колку и годишните одмори.

На грчките патишта возењето под дејство на алкохол може да ги чини возачите и до 1.200 евра. Брзото возење во село, повеќе од 20 километри на час над дозволеното чини 100, поминувањето на црвено светло се казнува со 700 евра, а неносењето појас 350 евра. Непрописното паркирање на туристите ќе им се наплаќа од 40 до 80 евра, додека користењето мобилен телефон додека возите се казнува со 100 евра. Патувањето за Грција годинава носи и повеќе проблеми поради работи на пат, бидејќи во моментов се работи на обиколницата кај Солун, која ќе трае во наредните четири години. Постојано се испраќаат известувања дека бајпасот треба да се избегнува наутро во периодот од седум до 10:30 часот и попладне од 15 до 19 часот. На оние кои летуваат на Халкидики ќе им треба малку повеќе време на овој дел од патот, иако се нудат и алтернативни рути низ индустриската зона и центарот на градот.