Американскиот претседател Доналд Трамп планира да објави за време на неговата посета на Саудиска Арабија следната недела дека САД ќе го нарекуваат Персискиот Залив Арапски Залив, соопштија американски официјални лица.

Персискиот Залив е познат под тоа име уште од 16 век, но употребата на името „Арапски Залив“ е доминантна во многу земји од Блискиот Исток. Арапските земји инсистираа на промена на географското име на Заливот, додека Иран инсистира на старото име за Заливот.

На Google Maps во САД, таа водна површина се нарекува Персиски Залив (Арапски Залив). Apple Maps го наведува само името Персиски Залив. Американската војска го нарекува Персискиот Залив само Арапски Залив.

Името стана емотивно прашање за Иранците кои се горди на долгата историја на Персиската империја. Спорот се појави во 2017 година за време на првиот мандат на Трамп кога тој го употреби името Арапски Залив. Тогашниот ирански претседател Хасан Рохани му предложи на Трамп „да научи географија“.

Иранскиот министер за надворешни работи, Абас Арагчи, рече дека имињата на водните патишта на Блискиот Исток „не имплицираат сопственост од која било одредена земја, туку одразуваат заедничко почитување на колективното наследство на човештвото“.

„Политички мотивираните обиди за промена на историски воспоставеното име на Персискиот Залив укажуваат на непријателски намери кон Иран и неговиот народ и се силно осудени“, додаде Арагчи.

Меѓународната хидрографска организација, чиј член се САД, работи на тоа да обезбеди сите мориња, океани и пловни води во светот да бидат рамномерно истражени и мапирани, а исто така и именува некои од нив. Има случаи кога земјите го нарекуваат истото водно тело со различни имиња.