Американскиот претседател Доналд Трамп денеска повторно ги повика американските Федерални резерви (ФЕД) да ги намалат каматните стапки откако утрово беше објавен извештајот за вработувањата во САД во април, кој е подобар од очекуваното.

„Бензинот штотуку ја проби надолу границата од два долари за галон, што е најниска цена во последните неколку години, цените на намирниците (и јајцата!) паднаа, цената на енергијата е во пад, каматните стапки на хипотеките паднаа, вработеноста е силна и уште многу добри вести, бидејќи милијарди долари пристигнуваат од царините“, напиша Трамп на својата социјална мрежа.

Тој додаде дека ова е „преодна фаза“ и дека „тукушто почнуваме“.

„Потрошувачите со години чекаат цените да паднат. Нема инфлација, Фед треба да ја намали својата каматна стапка“, порача американскиот претседател.