Индустриското производството во септември е намалено за речиси 8%, соопшти Државниот завод за статистика. Од Организацијата на работодавач велат дека бројките се загрижувачки и дека е потребна итна интервенција.

– Во недостиг на природни ресурси, како злато, нафта или гас, во земја која нема развиен туризам, единствен двигател на економијата е индустриското производство и извозот. Падот се должи на неколку фактори – надворешни, на кои не можеме да влијаеме, но и внатрешни, кои треба што поскоро да се променат, вели првиот човек на Организацијата, Ангел Димитров, според Сител.

– Случувањата во Западна Европа и Германија, како наш најголем трговски партнер, имаат влијание врз извозот и ние не можеме ништо да направиме, но секако има и домашни фактори како недостигот на работна сила, неадекватната администрација која го кочи бизнисот, доцнење со спроверување реформи, проблеми во образованието и слично, вели Димитров.

Димитров очекува подобри бројки откако парите од унгарскиот заем ќе стигнат до компаниите. кои со инвестиции во нова опрема и модернизација ќе ја намалат зависноста од работна сила. Но, на долг рок проблемот со кадар ќе продолжи да биде закана за економијата.

– Со тие 250 милиони евра поволни кредити ќе се набави нова технологија и ќе се помогне во индустријата. Но јас мислам на долг рок, проблемот со работна сила се уште ќе биде присутен, додава Димитров.